Lere Prefere Halot Max Sthal Iha Loron 12 Novembru, Ohin Mos Selebra Sebastiao Nia Mate

Smnewstl.com 28-10-2021 (Dili) – Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur ‘hakarak’, serimónia funeral bá saudozu jornalista señór Max Stahl iha ámbitu komemorasaun loron masakre santa kruz 12 Novembru bá dala-30 iha fulan oin.

Lere Anan Timur aprezenta pozisaun ne’e, relasiona ho jornalista señór Max Stahl ne’ebé termina ona jornada moris iha ospitál Brisbane Austrália, tanba sofre moras kankru.

“ Ne’e hanesan hau nia hanoin deit, maibe ne’e depende bá desizaun governu nian, mais sé ha’u-nia opiniaun karik ha’u fó rajaun bá sira-ne’ebé hanoin atu mai hakoi iha 12 novembru, loos duni ita bele rai to’o 12 novembru hakoi iha 12 novembru,” dehan Xefe Estadu Maiór F-FDTL, Tenente Jenerál Lere Anan Timur, iha Kuartel Jenerál Fatuhada, Dili, kinta ne’e.

Jornalista señór max Stahl nu’udar erói bá Timor-Leste nian, ho prezensa Max Stahl ho nia kolega sira konsege halo filmajen kona-ba akontesimentu Masakre Santa Kruz 12 Novembru iha tinan 1991 mak halo mundu internasionál hatene funu iha Timor seidauk hotu.

Tan ne’e Lere dehan, fízikamente Max Stahl nia isi lolon mak la hamutuk ona ho povu Timor-Leste, maibé ninia istória no memória sei la lakon iha timoroan sira-nia fuan no neon.

“Ohin dader ha’u simu informasaun, notísia ké ita-nia jornalista Max Stahl mate, nia mate ona, maibé ninia istória la lakon iha Timor nian memória, ninia memória la lakon iha Timor nian fuan, tanba de’it nia ho ninia ekipa mak masakre santa kruz 12 Novembru mundu bele rona, nia bele mate, fízikamente la hamutuk ona ho ita, maibé ninia memória saida mak nia halo, la lakon iha povu Timor-Leste nia memória,” dehan Lere.

Entretantu, jornalista señór Max Stahl hakotu iis iha loron 28 fulan Outubru iha ospitál Brisbane Austrália, tanba sofre komplikadu, hafoin halo tratamentu saúde durante fulna hirak nia laran.(ant)