Lere Konsidera Saúde Militár Importante bá Forcas Armadas

Smnewstl.com 23-11-2021 (Dili) – Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Lere Anan Timur konsidera saúde Militár importante tebes bá membru F-FDTL tanba militár tenki iha saúde di’ak atu hala’o servisu.

Tersa-feira ne’e, akompañadu husi Espoza atuál Deputada bankada FRETILIN, Cidália Mesquita, Lere Anan Timur halo check-up saúde iha kuartel Polísia Militár, Kintal Boot, Dili.

Hafoin check-up, lider masimu Falinti-FDTL ne’e haktuir, saúde Militár nu’udar programa ida husi F-FDTL ne’ebé sempre halo kada tinan, maibé, tinan kotuk la konsege tanba laiha osan.

“Saúde ne’e importante, saúde ne’e, ita bele dehan, determinante bá atividade hotu-hotu, militár tenki saúde di’ak, tinan ida-ne’e mak saúde militár halo programa hodi check-up bá militár hotu-hotu,” dehan Tenente Jenerál Lere Anan Timur.

Líder Ezésitu ne’e hatutan, membru F-FDTL 1000 resin maka teste ona sira-nia saúde, enkuantu sei falta komponente terrestre mak seidauk.

Enkuanto Rezultadu saúde husi Tenente Jenerál Lere ho nia espoza rasik sei fo sai iha loron aban (Kuarta-feira) tanba parte médiku sei halo ezaminasaun iha laboratóriu nasionál.

Fatin hanesan, Xefe Saúde Militár, Tenente Koronel Guido de Oliveira hatutan, rezultadu teste hahú husi dia 1 liu bá dia 22 Novembru, seidauk fo sai bá públiku katak, tipu moras saida de’it mak ejiste makas iha F-FDTL, tanba sei halo hela análiza iha laboratórium.

“Rezultadu hotu-hotu husi dia 1 ninian to’o horseik sira rekapitasaun hela, depois rekapitasaun tiha mak ita hatete katak, moras fuan nian hanesan ne’e, moras tiberkuloze, moras sira seluk hanesan ne’e, nestemomentu ita seidauk hatene, sá tipu moras mak ejiste makas iha F-FDTL laran, maibé, ita hein katak, depois finaliza relatóriu ida-ne’e, ida por ida ita hatene hela,” dehan Tenente Koronel Guido de Oliveira.

Maibé, Tenente Koronel ne’e dehan, bainhira deteta membru F-FDTL ruma mak hetan moras fuan, tiberkuloze no seluk tan, F-FDTL koopera ona ho Klínika Fundasaun Klibur Domin Tibar atu fó tratamentu bá membru ne’ebé hetan moras.

“Depois de ita deteta ita tenki halo tratamentu, tratamentu ne’e úniku solusaun bá ema ne’ebé hetan kauza moras. Pur-ezemplu moras fuan ita tenki halo tratamentu, moras tiberkuloze ita tenki halo tratamentu, tanba mak objetivu check-up ida-ne’e identifika sá tipu moras mak ejiste iha F-FDTL laran,” afirma nia.

Tenente Koronel Guido de Oliveira reafirma, 90% F-FDTL iha ona ekipamentu saúde, tan ne’e, bá futuru F-FDTL mak sei halo check-up rasik bá nia membru sira, maibé, nafatin husu apoiu bá espesialísta sira iha HNGV inklui parseiru ONG sira.

Entretantu, atividade Check-up saúde militár ne’e hala’o, tanba servisu hamutuk entre F-FDTL, Ospitál Naisonál Guidu Valadares (HNGV) no mós Klínika Fundasaun Klibur Domin.(ant)