Lere Husu Meta Malik Define Veteranus Ne’ebé Merese Hakoi Iha Jardim Eróis Metinaro

Smnewstl.com 23-11-2021 (Dili) – Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Lere Anan Timur husu ba Ministériu Assuntu Kombatentes Libertasaun Nasionál (MAKLN), liderado Julio Sarmento Meta Malik no Konsellu Kombatentes Libertasaun Nasionál (KKLN) atu kria lei hodi define veteranu ne’ebé mak merese atu Halo’ot iha Jardim dos Eróis Metinaro.

Tenente Jenerál Lere Anan Timur dehan, daduak ne’e, nia observa iha Semitériu Jardin Eróis Metinaro hakoi mate kahur malu de’it, tanba ema ne’ebé uluk lakoi ukun-an mós halot hotu iha Semitériu refere. Lider masimu F-FDTL ne’e konsidera, situasaun refere akontese tanba laiha regras atu define sé los mak merese atu hakoi iha ne’ebá.

“Ministru Veteranus tenki hatur ona regras ka lei, sé mak merese bá hakoi iha Metinaro, sé mak merese bá hakoi Jardin Eróis, sé mak merese salvu de tiru,” dehan Tenente Jenerál Lere Anan Timur, hafoin halo check-up saúde iha Kuartél Polísia Militár Kintal Boot, Dili, Tersa-feira ne’e.

Lere dehan, tuir loloos, bainhira Prezidente Repúblika atu dekreta dekretu ruma hodi hakoi mate ruma iha Semitériu Jardin Eróis Metinaro, tenki konsulta ho veteranus sira, nune’e bele tuir nível no eskalaun.

“Ha’u bele dehan katak, sala ne’e ha’u-nian, mais Prezidente Repúblika mós podia konsulta, porque ne’ebá ne’e barak lakoi mai atu hakoi iha Metinaro. Ita la define regras atu hakoi ema iha ne’ebá, sé mak bele hakoi iha ne’ebá, sé mak labele hakoi iha ne’ebá, sé hakoi iha ne’ebá mós tuir nível, eskalaun sira-ne’e,” tenik nia.

“Ita haree pur-ezemplu ita-nia na’i ulun sira, ita-nia maun boot sira mate, pur-ezemplu saudozu katuas Xavier nu’udar primeiru Prezidente Repúblika, depois tuir mai maun Mauhuno primeira jerasaun Komité Sentrál FRETILIN nian, saúde Prezidente Nicolau Lobato sira-ne’e ita hili iha leten,” hatutan nia.

Maski nune’e Lere afirma, estadu iha hanoin di’ak mak halo ona Semitériu Jardin Eróis no mós Semitériu bá Eróis sira iha Munisípiu, tanba estadu hakarak dignfika no valoriza nafatin sira. Ba pozisaun Lere ne’e rasik, parte MAKLN ho KKLN seidauk aprezenta pozisaun.(ant)