Lere Hakarak Komemorasaun 28 Novembru Iha Baucau Lao Susesu, La Tolera Kriminozu

Smnewstl.com 23-11-2021 (Dili) – Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Lere Anan Timur, husu Polísia Nasionál Timor-Leste (PNTL) atu toma medida ne’ebé forte hasoru kriminozu sira-ne’ebé tenta kria instabailiade iha komemorasaun loron Proklamasaun Independénsia 28 Novembru bá dala 46 iha Munisípiu Baucau.

Lere dehan, estadu iha programa hodi realiza eventu nasaun nian hanesan, 20 Maiu ho 28 Novembru iha Munisípiu sira, tan ne’e, iha tinan 2021 ne’e, komemora loron Proklamasaun independénsia bá dala 46 iha Munisípiu Baucau.

“Mas Polísia mak tenki toma medidas forte hanesan mós autoridades, tenki medidas forte bá ema kriminozu sira ema indisiplinadu sira, ema ne’ebé mak hakarak kria instabailiade,” dehan Tenente Jenerál Lere Anan Timur, iha kuartel Polísia Militár Kintal Boot, Dili, Tersa-feira ne’e.

Lere deklara, loron Proklamasaun independénsia 28 Novembru hala’o iha Munisípiu Baucau ne’e, programa estadu nian, tan ne’e sei laiha ema ida mak atu halo sabutajen bá programa ne’e.

“Maibé ha’u hanoin katak, 28 halo iha ne’ebá ne’e estadu nia serimónia, ne’e só a não ser que Timor ne’e naben, Timor ne’e ema ida atu mai halo sabutajen bá estadu nia serimónia ne’e possa ne’e ema ne’e dalaruma lahatene,” tenki nia.

Lere hatutan, Munisípiu Baucau hanesan baze bá rezisténsia armanda, maibé, ho hahalok husi joven sira-ne’ebé kontinua oho malu no sunu ne’e mak sei nega no trai fali Baucau oan ne’ebé mak mate iha funu laran.

Maibé Xefe Estadu Maiór F-FDTL ne’e fi’ar katak, ho selebrasaun 28 Novembru  ne’ebé sei hala’o iha Munisípiu Baucau, joven sira sei muda atetude no manán konsiénsia, tanba konsidera Munisípiu Baucau hanesan baze bá rezisténsia armada nian Inklui mos baze bá liberdade ho independénsia, tan ne’e fi’ar katak, sira sei manán konsiénsia.(ant)