Lere Fi’ar Lú-Olo, Pronto Kompete Iha Eleisaun Presidensial

Smnewstl.com 28-01-2022 (Dili) — Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur fi’ar katak, Prezidente Repúblika (PR), Francisco Guterres Lú-olo la impede ninia karta reforma ne’ebé governu aprezenta.

Iha kinta-feira (27/01/2022), Xefe Estadu, Francisco Guterres Lú-olo konvoka enkontru konsellu superiór defeza no seguransa hodi rona membru konsellu sira-nia hanoin kona-ba karta reforma ne’ebé Tenente Jenerál Lere Anan Timur aprezenta.

Governu liu husi reuniaun konsellu, aprova ona pedidu reforma Xefe Estadu Maiór F-FDTL, Tenente Jenerál Lere Anan Timur ne’ebé aprezenta Ministru Defeza, Filomeno Paixão iha loron 21 fulan Janeiru 2022.

“La impede ida, porque kandidatura ne’e dia 2, 3 mak hatama ga la’e, ha’u la fi’ar katak, señór Prezidente nu’udar ha’u-nia Kompañeiru, nu’udar ha’u-nia irmaun atu impede ha’u-nian ne’e laiha, ema seluk karik ha’u diskonfia,” dehan Xefe Estadu Maiór Jenerál F-FDTL, Tenente Jenerál Lere Anan Timur, iha kuartel jenerál F-FDTL, Fatuhada, Dili, sesta ne’e.

Lere rekuiñese, reuniaun konsellu superiór defeza no seguransa ne’e la’ós atu aprova pedidu reforma, maibé, Prezidente Repúblika atu rona hanoin husi membru sira-nian.

Tanba ne’e Lere afirma, ninia kandidatura sei lori veteranus no mós rezisténsia tomak nia naran, maibé nafatin ema FRETILIN.

“Ha’u sé kandidata ha’u-nian aan, ha’u lori veteranus, rezisténsia tomak nia naran, mais ha’u ema FRETILIN ida-ne’e mak importante,” deklara Lere.

Entretantu, Tenente Jenerál Lere Anan Timur afirma, seidauk nesessáriu atu bá rejista kandidatura iha Tribunál Rekursu.(ant)