Lei La Obriga Funsionáriu Liu Tinan 60 Tenki reforma

Smnewstl.com 18-10-2021 (Dili) – Prezidente Komisaun Funsaun Públika (KFP), Faustino Cardoso afirma, maski iha ona lei lei n0.12/2016 kona-ba rejime kontributivu seguransa sosiál, maibé seidauk iha artigu ida mak atu obriga funsionáriu públiku ne’ebé idade atinji ona 60 tenki reforma.

Faustino Cardoso hatutan, totál funsionáriu públiku hamutuk 35,525 ne’e, seidauk iha ida maka aprezenta ona ninia karta rekerimentu apojentasaunn bá KFP hodi husu atu reforma ona, maske sira-nia tinan atinji ona 60 bá leten.

Tan ne’e, bainhira sira-nia tinan liu ona 60 la hatama karta apojentasaun reforma nian, KFP nafatin konsidera sira hanesan funsionáriu atividu iha funsaun públiika.

“To’o ohin loron ita-nia lei kona-ba reforma lei n0.12/2016 seidauk iha artigu ida ne’ebé obriga funsionáriu públiku sira atu reforma bainhira atinji ona 60 anos,” dehan Prezidente KFP, Faustino Cardoso, hafoin remata enkontru ho Primeiru-Ministru, Taur Matan Ruak, iha rezidénsia Farol, Dili. Seguransa ne’e.

Faustino hatutan, Parlamentu Nasionál (PN) tau ona iha ajenda atu halo alterasaun bá lei n0.12/2016 kona-ba seguransa sosiál ninian, nune’e bele hamosu tan artigu ida hodi obriga funsionáriu públiku ne’ebé liu tinan 60 tenki reforma ona.

“PN tau ajenda prioridade atu halo alterasaun bá lei n0.12/2016 kona-ba seguransa sosiál ninian, ne’ebé sei hamosu artigu ida obriga ema funsionáriu ida atu tama reforma bainhira nia to’o ona limite efetivu servisu iha funsaun públika. Idade efetivu ne’e mak hanesan baibain ita rona dehan, 60 anos, agora 60 anos ne’e tenki define iha lei par KFP hamutuk ho instituisaun sira seluk bele implementa, kuandu laiha labele halo buat ida no depende de’it bá dispozisaun ou hakarak ema ida-idak ninian,” dehan nia.

Prezidente KFP ne’e relata tan katak, to’o oras ne’e, iha funsionáriu públiku hamutuk 2000 resin mak ho voluntariamente hatama ona sira-nia pedidu apojentasaun reforma bá KFP hodi husu reforma, tan ne’e sira sei simu pensaun tuir persentajen grau antiguidade ida-idak nian.(ant)