Lakoi Preokupa ho Deklarasaun Lere, Horta Pronto Tuir Xanana Gusmao

Smnewstl.com 28-11-2021 (Railaku) – Premiado Nobel da Paz, Jose Ramos Horta deklara, respeita Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Lere Anan Timur nune’e fo konselhu atu bele fila deit ba Iliomar hodi tau matan ba bei-oan sira.

Premiado Nobel da Paz, Jose Ramos Horta hetan esplikasaun husi komisaun organizadora ba jogu futebol amizade iha ambiitu komemorasaun loron Proklamasaun 28 Novembro ba dala 46 Iha Posto Administrativo Railaco, Municipio Ermera. Foto Smnewstl.com Mariano Costa

Horta dehan, hanesan diplomata senior la tau kestaun ba deklarasaun Lere ne’ebe husu ba Komandante Eim Xefe das Falintil, Kay Rala Xanana Gusmao wainhira apoio Kandidatu Presidente Republika ba perido 2022-2027 ruma karik tenki hare ba figura ne’ebe mai husi Ailaran no lakoi ba ema seluk tamba konsiderado hanesan laiha moral.

“Hau hanoin diak liu, dala ruma, avo lere ba deit Iliomar hare susuben ba beioan sira, ba sosa manu timur, manu tolun ba bei oan, lalika koalia fali politika,”dehan Horta ho expresaun hamnasa hafoin partisipa komemorasaun 28 Novembro iha Posto Administrativo Railaco, Municipio Ermera, Domingo ne’e.

Premiado Nobel da Paz, Jose Ramos Horta Foto hamutuk ho pesoal saude ne’ebe fo asistensia ba sermonia Icar Bandeira Proklamasaun Independensia 28 Novembro ba dala 46 iha Posto Administrativo Railaco, Municipio Ermera. Imagem Smnest.com Mariano Costa

Antigo diplomata ne’e hatutan, Lere hanesan ema ne’ebe diak tebes husi nia matan. Tamba ne’e sujere atu konsentra lai hodi la koalia politika.

“Lere ema diak, hau ba vizita nia iha Ilimor-Lospalos, uma furak los, uma lisan kapas, nia ema ida simples ke la hatudo a’an nia riku ka lae, hau respeita nia, mas hau nia konselhu ba nia mak ne’e hare tau matan ba bei oan sira, tamba nia bei oan lubuk ida iha neba,”afirma tan Horta ho hamnasa deit.

Kona ba deklarasaun Lere karik konsiderado hanesan presaun ruma, Horta hatutan tan katak, kuinese diak Lere nune’e buat saida mak koalia ohin, dala ruma aban fali bele haluha ona.

Ligado ho kandidatura ba Presidente Republika, Horta sublinha laos prioridade ida ba nia, maibe prioritario maka oinsa Kay Rala Xanana Gusmao bele kaer fali pilotu ro’o ahi bo’ot ida, mas tamba ne’e rai ida, entaun ro’o ahi ne’e la bokan. Mais sei infrenta oceano ka dejafiu oi-oin maske la bokan tama tasi, maibe bele nakdoko. Tamba nia (Xanana) kaer tia ona ro’o ahi bo’ot ida ne’e, iha momentu istoria ke susar teb-tebes kuando Komite Central nakfera kauze 100%, nia mak kaer ro’o ahi ne’e, tau ai foun, bela foun, motor foun hodi to’o 1999 mai to’o agora, entaun hau hanesan ajudante komandante ro’o ahi ne’e nian deit, mekanik ne’e hau la hatene,”tenik Horta

Eis lider diplomata fundamenta, nia labele atu hateten Xanan apoio maka kandidata a’an, maibe iha ona hanoin rasik, tamba ne’e prefere apoio deit iha governasaun Xanaan karik hetan fiar husi povu.

Hau labele hateten, avo nana apoio mak hau ba, lae, hau iha hanoin rasik. Se’e maun Xanana bele apoio mos, hau lalika ba. Diak liu, hau tama deit governo, servisu ho maun Xanana. Se’e lideransa CNRT hili kandidatu seluk iha CNRT, ne’e direitu, CNRT iha ema diak no ita tenki fo komfiansa ba sira e hau nudar jerasaun 1975 ho esperensia naruk sei iha obrigasaun politika, komitmentu pesoal apoio Presidente ne’ebe maun Xanana indika.

“Se’e nia obriga hau mak kandidata a’an hanesan 2006, ubriga hau ba Primeiro Ministro, 2007 bolu hau hateten o kandiata Presidenti. Kuando 2012, apoio Taur Matan Ruak, hau dehan ne’e mos diak, 2017 apoio Lu-olo, ne’e mos diak, mas depois nia arepende karik, hau la hatene,”refere Horta. (Rio)