Lakoi Nasaun Kontinua Moris Iha Inserteza, Quadros Rezistensia Reafirma Apoio Total ba Horta-Xanana

Smnewstl.com 15-01-2022 (Dili) — Movimentu Quadrus Rezisténsia no Rezisténsia Apoiu Xanana (MOQURA-X) reafirma sira-nia pozisaun liu husi komferénsia nasionál hodi fó apoiu tomak bá Líder Karismátiku, Kay Rala Xanana Gusmão iha eleisaun prezidensiál 2022 no mós eleisaun parlamentár 2023.

Porta-voz Naisonál MOQURA-X, Cesar Valente de Jesus hateten, objetivu husi komferénsia ne’e mak atu deklara ofisialmente ezisténsia MOQURA-X hodi afirma prinsípiu libertasaun povu, tanba MOQURA-X ne’e mai husi kaixa no kuadru rezisténsia de’it.

“Movimentu ida-ne’e hamrik ho kuadrus rezisténsia, signifika mai husi kaixa, estafeta, selkom, nurep, zona, sub-rejiaun no to’o iha nível rejiaun. Ne’ebé ninia objetivu prinsipál loos mak atu fó mensajen bá rezisténsia hotu katak, ita la funu para ikus mai ita kria fali situasuan ida inserteza iha ita-nia rain ho ita-nia povu,” dehan Porta-voz MOQURA-X, Cesar Valente, iha salaun Dom Bosco Comoro, Dili, Sábdu-feira ne’e.

Nia hatutan, MOQURA-X presiza kualidade lideransa hanesan, Kay Rala Xanana Gusmão, tanba bele hakuak ema hotu.

“Kualidade lideransa mak ita presiza, la’ós ita kontente ho ida-ne’ebé lor-loron ita hamutuk la’e. Ita presiza kualidade lideransa tenki asegura ema hotu, agora ho mensajen figura rua ohin demonstra katak, Maun Xanana nia kualidade lideransa bá MOQURA-X konfirma katak, nia sei bele halo di’ak,” dehan Cesar.

“Deklarasaun MOQURA-X ne’e mós atu antisipa de’it espasu iha tempu eleisaun prezidensiál no própriu partidu CNRT raisk lideradu Kay Rala Xanana Gusmão.

Sorin seluk, Eis Prezidente Repúblika (PR), José Ramos-Horta hateten, MOQURA-X konvida atu loke komferénsia nasionál bá veteranus no mós kuadru rezisténsia ne’ebé integra aan iha MOQURA-X, inklui partidu polítiku lubuk ida, ne’ebé hakarak fó apoiu másimu bá Líder Karismátiku, Kay Rala Xanana Gusmão.

Tanba ne’e Horta afirma, tinan 5 no 10 mai, di’ak liu entrega nasaun ne’e bá Kay Rala Xanana Gusmão mak lidera, nune’e bele rezolve dezafiu ne’ebé durante ne’e nasaun hasoru.

“Sira konvida ha’u atu loke komferénsia, tema mak apoia Maun Xanana, ha’u mai ida-ne’e tanba ida-ne’e duni, tanba iha tinan 5 tinan 10 mai ne’e, ha’u fi’ar di’ak liu bá rai ida-ne’e, entrega lideransa rai ida-ne’e bá Maun Xanana, tanba dezafius barak loos, dezafius ita-nia situasaun interna, ekonomia, dezafiu bá governasaun, retifikasaun bá problema ne’ebé akontese iha Parlamentu ho Prezidénsia Repúblika,” dehan Horta.

Dezafiu seluk ne’ebé Timor-Leste hasoru maka kona-ba dezenvolvimentu projetu tasi mane hodi dada kadoras greatee sunrise mai Timor-Leste, inklui mós adezaun Timor-Leste nian bá ASEAN.

“Entaun ha’u marka prezensa bá ida-ne’e, la’ós ko’alia kona-ba ha’u-nia kandidatura ga la’e. Ne’e bele akontese karik ohin ka aban la bairua ha’u lahatene, ha’u seidauk preukukadu ho ida-ne’e, ha’u mai tanba movimentu ida ké apoia Maun Xanana,” tenik Horta.

Nune’e mós, Sekretáriu Jerál Interinu Partidu CNRT, Jacinto Rigoberto de Deus hateten, CNRT nu’udar partidu boot ne’ebé ho lideransa Karismátiku, Kay Rala Xanana Gusmão, sente laran metin teb-tebes ho prezensa movimentu lubuk ida-ne’ebé deklara ho sira-nia vontade rasik apoia Kay Rala Xanana Gusmão.

“Ohin iha ita-nia le’et movimentu MOQURA-X ne’ebé rejístu ona iha partidu CNRT, partidu CNRT akompaña movimentu MOQURA-X nia atividade, ami hatene muito bem katak, MOQURA-X iha determinasaun teb-tebes atu apoia Maun Boot ho partidu CNRT,” dehan Jacinto Rigoberto.

Tanba ne’e, Jacinto Rigoberto lori estrutura tomak partidu CNRT nia naran, agradese bá MOQURA-X, no apresia tebes ho inisiativa tomak husi estrutura no kuadru rezisténsia MOQURA-X bá inisiativa ida-ne’e hodi fó apoiu totál bá Partidu CNRT ho Kay Rala Xanana Gusmão.