Laiha Carro Funerario, Familia Lori Mate Isin Martinha Martins ba Halerik Iha Administrasaun Municipio Ermera

Smnewstl.com 20-11-2021 (Dili) – Kalan ne’e, mazumenus tuku sia ho balun oras Timor Leste, familia hulan deit mate isin ida ho identidade kumpletu Martinha Martins ba halerik iha Administrasaun Municipal Ermera kauza husi laiha Carro Funerario no kaisaun hodi transporta matebean ba horik fatin hodi halo’ot.

Kronologia ne’ebe SMNews asesu komfirma, Martinha Martins hakotu i’is iha loron ohin, Sabado, (20-11-2021) mazimenus tuku ida madrugada iha nia rezidensia Maudiu, Suco Fatuquero, Posto Administrativo Gleno, Municipio Ermera.

Tuir planu lokoraik ne’e familia atu transporta hikas mate isin ba halo’ot iha Knua Aldeia Lubulala, Suco Poetete, Posto Administrativo Ermera, maibe tenki atraza kauza husi laiha Carro Funerario no Kaisaun.

Ba situasaun ne’e, familia deside hodi leba deit mate isin husi rezidensia ba konsentra iha Administrasaun Municipal hodi husu responsabilidade husi maker ukun li-liu Administrador nune’e buka dalan solusiona.

To’o iha neba komu kalan ona no laiha lider municipal ruma mak konsidera nune’e buka dala hodi husu fali ba Timoroan laran luak balun hodi aprezenta situasaun ne’e ba Kay Rala Xanana Gusmao ne’ebe iha hela Estrangeiro liu husi media social nune’e orienta kedas Jacinto Rigoberto de Deus atual Secretario Executivo Partido CNRT hodi halo intervensaun hanesan apoio Kaisaun inklui Ambulansia.

Reprezentante familia Antonio Maudiu agradese ba Kay Rala Xanana Gusmao ne’ebe maske halo hela servisu nasaun nian iha rai liur, maibe nunka taka tilun ba povu nia halerik.

“Ohin kalan ne’e, hau foin sente duni katak, maun bo’ot Xanana ne’e, ema ida ne’ebe apoio ema la hare ba kor no rasa. Maibe nia hare liu ba vida umana, tamba ne’e maske hanesan ema bai-bain no hela deit ho naran bo’ot ida lider nacional, maibe rona deit povu nia susar, nia mak hamrik kedas iha oin. Obrigado maun bo’ot, maromak akompanha nafatin hodi haraik vida naruk ba ita bo’ot,”haktuir Antonio ho sebtimentu triste kahur ho emosional tamba la imagina hetan apoio husi Xanana.

Mate isin rasik to’o iha Administrasaun Municipal tuku sia ho balun kalan no tuir informasaun labele halo buat ida kauza husi Carro Funerario ne’ebe a’at inklui laiha orcamento ba sosa Kaisaun

To’o informasun ne’e fo sai maske mate isin konsege tranlada ona ba horika fatin ne’ebe tuir informasaun ho distansia kilometri 20 resin husi Administrasaun Municipal Ermera, maibe parte Administrasaun inklui Ministerio kompotente mos seidauk aprezenta pozisaun. (Rio)