La Simu ho Palavra Ezonera, Coliati Husu Esplikasaun Governo

Smnewstl.com 02-12-2021 (Dili) – Xefe Estado Maior General Forca Armandas, Brigadeiro Jeneral Calisto Santos ‘Coliati’ reafirma tan katak, hanesan militar nafatin komprimenta ba orden pronto atu simu desizaun husi governo, maibe hanesan umana no sidadaun la simu ho liafuan ezonera.

Coliati dehan, hanesan militar la kestiona ba desizaun governo karik atu halo hasai ou halo transferensia. ba kualker pozisaun ruma. Maibe nudar ema umana sente laran moras no la simu maka palavra ezonera.

“Desizaun atu muda ka tau ba ne’ebe deit, hanesan militar hau la kestiona, hanesan sidadaun, umana maubere oan sente laran moras no la simu maka liafuan ida ezonera. Dala ruma keta ladun kumprende portugues, mas liafuan ida ezonera, ne’e kasar teb-tebes e publiku bele konsidera hau dala ruma naok osan (korupsaun) ou bo’ok fali hau nia tropas milittar feto sira maka copot hau derepenti ne’e,”kestiona Coliati liu husi konferensia imprensa, Kinta-feira ne’e, iha Quartel General Fatuhada Dili.

Ligado ho palavra ezonera, Coliati rekere ba Ministro Defesa no Konselhu Ministro atu halo esklaresimentu klaru nune’e la hamosu duvidas iha sosiedade. “Kuando la halo esklaresimentu, povu ne’e duvidas e bele dehan tan, Coliati kal dala ruma naok osan maka ema ezonera ne’e.

Xefe Estado Maior General ne’e rekuinese, seidauk simu karta ofisial husi governo, maibe tuir akompanhamentu husi media sente ladun kontenti no husu atu halo esklaresimentu. Coliati dehan tan, hafoin informasaun ne’e fo sai nia parte hetan kontaktu barak tebes, maibe labele halo esplikasaun ho razaun governo mak iha kompotenesia ba ida ne’e.

Ba situasaun ne’e, eis Secretario Estado Defesa, Julio Tomas Pinto esplika, tuir estatatu e lei organiku F-FDTL, mandantu ida ba Komandante Komponentes ho Xefe Estado Maior ne’e tinan 2 deit, nune’e Komandante Coliati nia mandantu parese remata ona.

Nia hatutan, proposta kona ba ezonerasaun tenki mai husi Komando F-FDTL e depois aprezenta ba iha konselho militar hodi hetan apresiasaun no lori ba Ministro Defesa hodi propoin ba konselho ministro atu ezonera ka lae, ne’e kompotensia Presidente Republika.

“Agora dadaun, Komandante Coliati seidauk ezonera, foin mak proposta no governo konkorda ona, maibe atu ezonera ne’e kabe ba kompotensia Prersidente Republika. Ita tenki hatene komandante Coliati potensia diak ida husi instituisaun F-FDTL. Koalia recursu humanos, iha militar ida maka Coliati,”tenik Julio Tomas Pinto ba SMnews via telefone.

Julio rekuinese, Coliati hanesan potensia diak tamba hasai kursu Estado Maior iha Australia, Portugal, Amerika, Malaysia no seluk tan.

Enkuantu, tuir informasaun husi fontes kredibel katak, Komandante Coliati sei hetan nomeasaun ba pozisaun foun. Ligado ho ne’e maka tenki hetan ezonerasaun husi pozisaun Xefe Estado Maior hafoin ba asume fali kargu foun.

Fonte ne’e esplika, ezonerasaun la signifika Komandante Coliati halo sala, maibe ezonera pozisasun Xefe Estado Maior para bele hetan fali nomeasaun ba pozisaun foun karik,”tenik fontes ne’e.

fontes kredibel ne’e espera Komando F-FDTL bele utiliza recurso ne’ebe iha hanesan Komandante Coliati nune’e dezenvolve militar sai professional liu tan. (Rio)