La Selu Arendamentu ba Rai Estado, PM Taur Orienta MJ Hakotu Kontratu

Smnewstl.com 23-09-2021 (Dili) – Primeiru-Ministru (PM), Taur Matan Ruak, orienta Ministru Justisa (MJ), Manuel Cárceres atu hakotu kontratu ho empreza ne’ebé mak lakoi selu arendamentu bá rai estadu, tanba ne’e fó prejuizu bá estadu.

Ministru Justisa, Manuel Cárceres da Costa informa bá Xefe Governu, Taur Matan Ruak katak, tinan ida-ne’e, reseitas husi terras prioridades liu-liu kona-ba arendamentu bá rai estadu nian menus, tanba kauza husi pandemia Covid-19.

Nia hatutan, reseitas terras prioridades nian menus ne’e, tanba iha empreza boot barak mak la selu arendamentu bá estadu.

“Kona-ba terras prioridades, ha’u informa bá Primeiru-Ministru katak, reseitas husi arendamentu tinan ida-ne’e menus, tanba situasaun pandemia ne’e, barak mós deve. Sira deve ne’e sira-ne’ebé kontratu boot sira mak deve. Prejuizu bá estadu, ha’u mós iha ona apoiu husi Primeiru-Ministru bele taka tiha kontratu arendamentu la selu ne’e, mais tenki-ser reuniaun uluk ho sira,” dehan Ministru Justisa, Manuel Cárceres, hafoin remata enkontru ho PM Taur iha Palásiu Governu, kinta ohin.

Manuel Cárceres informa, totál orsamentu ne’ebé mak empreza sira sei deve hela husi arendamentu rai estadu ne’e kuaze milloens dólar amerikanu.

Tanba ne’e, antes hakotu kontratu arendamentu ho empreza sira-ne’e, PM Taur orienta Ministru Justisa, Manuel Cárceres, atu konvoka uluk enkontru, nune’e ejize sira-nia konsiénsia atu kumpre sira-nia dever.

Bainhira la selu mak, governu ameasa sei hakotu kontratu arendamentu ho empreza hirak ne’ebé la selu arendamentu bá estadu ne’e.

“Milloens barak deve, tinan-tinan ita iha previzaun par atu hetan to’o $ 6 milloens, tinan ida-ne’e menus teb-tebes, ha’u laiha dadus konkretus, mais ha’u hatene menus, tanba momentu ha’u reuniaun iha Ministériu Finansas, Ministru Finansas mós alerta mai ha’u dehan, reseitas estadu nian husi terras prioridades ne’e tun tiha ona,”

Cárceres rekoñese, reseitas husi terras prioridades bá kofre estadu tinan ida-ne’e menus, tanba iha ema barak mak la selu arendamentu bá estadu.(ant)