La Asina Pagamentu Bá Ró Tranship II, PM Taur Ezonera Prezidente APORTIL

Smnewstl.com 24-01-2022 (Dili) — Primeiru-Ministru (PM), Taur Matan Ruak ezonera ona Sexta-feira semana kotuk Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves  tanba la asina invoice pagamentu ba ró Tranship II, no mós akuza halo impededimentu ba manutensaun ró Berlin Nakroma maske hasoru hela situasaun Pandemia Mundial ka ameasa kovid-19.

Governu liu husi Ministériu Transporte Komunikasaun (MTK), aluga ró transship II husi nasaun Indonézia hodi halo operasaun tula pasajeiru Dili Oe-cusse no Ataúro durante fulan-rua fulan juñu ho jullu tinan 2021, no kada fulan ezekutivu selu osan ho montante hamutuk rihun $ 220.

Prezidente Konsellu Administrasaun APORTIL Sesante, Flávio Cardoso Neves hateten, bazeia bá karta ezonerasaun ne’ebé publika ona iha jornál Repúblika ne’e iha rajaun fundamental rua. Nia esplika, rajaun primeiru mak dehan, nia lakoi asina invoice pagamentu bá ró Tranship II ho valór orsamentu rihun $ 440. No rajaun segundu mak nia la autoriza ró Berlin Nakroma atu bá halo manutensaun iha Indonézia.

“Karta ne’e salah satu mak ha’u lakoi asina selu Tranship ne’e, rajaun sira ezonera ne’e salah satu mak ida kona-ba Nakroma tanba la bá manutensaun ne’e tanba situasuan Covid-19, ita mós labele bá duni, depois ita mós hakarak hatene jestaun,” dehan Prezidente APORTIL, Flávio Cardoso Neves bá smnewstl via telefóne, Segunda-feira ne’e.

Flávio klarifika, rajaun la asina asina invoice pagamentu bá ró Tranship II, tanba prosesu hotu sei la’o hela iha Tribunál, no mós invoice pagamentu ho kontratu ne’ebé asina ho ró Tranship II ne’e Ministru Transporte Komunikasaun (MTK), José Agostinho da Silva mak aisna, tanba ne’e la’ós kabe ba nia kompeténsia para atu asina.

“Ida-ne’e sira-nia konfiansa, lakoi halo ne’e kan sira bele ezonera, tanba ha’u haree tiha ona despaixu ezonerasaun pagamentu ne’e, ida-ne’e mós labele halo, tanba kontratu Ministru mak asina, invoice mós Ministru mak asina, ne’ebé ha’u-nia kompeténsia laiha ona, atu asina mak staff sira la ezekuta ne’e problema ema tékniku,” subliña nia.

Hanesan servidor publiku, Flavio afirma, simu desizaun ezonerasaun husi Xefe Governu, Taur Matan Ruak tamba konsiderado kargu ne’ebé asume nu’udar konfiansa polítika. Bainhira laiha ona komfiansa bele foti fila fali.

“Bá ha’u hanesan ne’e, kargu hanesan Prezidente Konsellu Administrasaun ne’e kargu konfiansa, karik sira la konfortável ona atu servisu ho ita, sira desizaun ruma, sira-nia orientasaun ita la halo sira hakarak hasai ita laiha problema, importante mak ita-nia komitmentu, ita kuandu dehan, labele halo labele halo,” tenik nia.

Entretantu, governu mós nomeia ona Prezidente Konsellu Administrasaun APORTIL foun ne’ebé sei lidera husi Lamartino de Oliveira, nune’e bele hahú ezekuta Orsamentu Jerál Estadu (OJE) 2022 ne’ebé Prezidente Repúblika promulga ona.

Enkuantu, mandadu Prezidente APORTIL Sesante, Flávio Cardoso Neves nian sei remata iha fulan Marsu tinan 2022 ne’e.(ant)