Kumpri Promesa, Naimori ho Membru Governo Khunto Iha Ona Ramelau

SMNewstl.com (DILI)-Partido Kmanek Haburas Unidade Nacional Timoroan-KHUNTO liderado Jose dos Santos Naimori Bucar funda iha sanulu liu ba.

Maske foin moris kompara ho Partido bo’ot sira hanesan Fretilin, CNRT, PD nomos ASDT, UDT, PSD inklui sira seluk, maibe neneik ho bebeik konsege tranforma a’an sai alternativa liliu iha governasaun dawalu liderado Eis Vice Komandante Eim Chefe das Falintil Taur Matan Ruak.

Pozisaun Partido Politiku ho asentu parlamentar kadeira lima ne’e reafirma antes ona tuir prinsipiu no nia lema katak, Tane O Rai, Tane O Lisan, Tane O Emar nune’e hakarak servi nasaun ho fuan mos no laran mos ba rai ne’e liu husi juramentu ba ninia kuadrus ne’ebe hola parte iha orgaun lejislativa nomos executivo.

Tuir informasaun ne’ebe SMNews asesu liu husi pagina facebook Kompatriotas Khunto komfirma katak, Presidente Khunto atual Vice Primeira Ministra no Ministra Solidariedade Social no Inkluzaun, Armanda Berta mos hola parte inklui membrus governo ho deputado sira.

Tuir planu serimonia ritual juramentu sei halao Sabado aban loron, 14-08-2021, iha Ramelau, Posto Administrativo Hatubuilico, Municipio Ainaro.

Serimonia juramentu ne’e rasik tuir reafirmasaun Konsilheiru Masimu Partido Khunto, Jose dos Santos Naimori Bucar katak, dalan uniku hakarak hili dalan sai servidor maka tenki servisu ho fuan mos no laran mos hodi hateten katak, buat nebe povu nian, tenki povu nian duni.

To’o informasaun ne’e fo sai SMNews seidauk hetan komfirmasaun ruma husi lider masimu Partido Khunto. (Rio)