Smnewstl.com 26-11-2021 (Dili) – Membru Falintil Forsa Defeza Timor-Leste (F-FDTL) na’in 16, termina kursu kona-ba jestaun no administrasaun durante fulan 4 iha Sentru Instrusaun Nicolau Lobato Metinaru.
Xefe Estadu Maiór Jenerál Forsas Armanda, Brigadeiru Jenerál Calisto dos Santos ‘Coliati’ hamutuk ho Diretór Projetu Númeru 2, Tenente Koronel João Pimenta no mós Adidu Militár husi Austrália, entrega sertifikadu bá formandu sira ne’ebé foin remata kursu.
Brigadeiru Jenerál Coliati konsidera kursu refere realiza liu husi kooperasaun téknika militár bá projetu númeru 2 ne’ebé mak halo kada tinan entre Timor-Leste ho nasaun sira hanesan, Portugál, Austrália, Japaun, Nova Zelándia, Amérika no seluk tan.
“Ohin ita hala’o kursu ida-ne’ebé atu kapasita ita-nia militares sira iha área jestaun, área administrasaun, ida-ne’e kooperasaun tékniku militár, projetu númeru 2 bá 2021 ho asesoria Portugál iha ne’e, ita-nia Tenente Koronel (João Pimenta) hanesan Diretór bá projetu, ohin ita remata kursu entrega sertifikadu bá ita-nia militares sira,” dehan Brigadeiru Jenerál Coliati, hafoin entrega sertifikadu bá formandu sira iha Kuartél Jenerál F-FDTL Fatuhada, Dili, sesta ne’e.
Coliati hatutan, Komandante F-FDTL barak mak mai husi ailaran, tan ne’e kuiñesimentu diferente ho membru foun sira.
“Sem dúvida ami katuas sira mai husi ailaran ne’e, ami-nia kuiñesimentu imi hatene, maibé, tinan 21 oan sira mós sai ona mesak matenek, sé eskola karik ema ne’e ema sai doutór ona, ne’ebé ha’u la gava militár sira, maibé ha’u konfia katak, militár sira diferente husi ami katuas sira mai husi ailaran, dalaruma imi ko’alia F-FDTL ne’e haree de’it mak ami ailaran sira, imi la haree ema foun sa’e ne’ebé tutan instituisaun ne’e,”
Coliati espera, ho kursu ne’e, membru sira bele preparadu liután atu bele hatutan no lidera instituisaun F-FDTL bá futuru, atu garante seguransa no defeza bá povu no nasaun.
Entretantu, kursu ne’e hala’o ho módulu ha’at hanesan. Módulu A, kona-ba enkuadramentu teóriku bá sistema formasaun nian, módulu B, relativamente ho planeamentu, konsepsaun, dezenvolvimentu instituisaun formasaun, C efetua jestaun formasaun no ikus mak prosede bá avaliasaun, formasaun.
Formandu na’in 16 ne’e kompostu husi ema na’in 5 husi Kuartél Jenerál, na’in 2 husi Komponente Terrestre, 4 husi Komponente Naval, na’in 1 husi Komponente Formasaun no Treinu Metinaru, na’in 2 husi Unidade FALINTIL no na’in 2 husi Polísia Militár.(ant)
Komentariu