Konstrusaun Uma Kbiit La’ek Iha Territóriu Nasionál Atinji 55%, Total Uma 1,254

Smnewstl.com 08-11-2021 (Dili) – Diretora Nasionál Programa Nasionál Dezenvolvimentu Suku (PNDS), atauliza bá Primeiru-Ministru (PM), Taur Matan Ruak katak, progressu konstrusaun bá uma kbiit la’ek iha territóriu Timor laran tomak atinji ona 55%.

Programa uma kbiit la’ek ne’e mai husi Ministériu Administrasaun Estatal (MAE) ne’ebé implementa ona husi Sekretariadu Tékniku PNDS dadauk hodi apoiu bá populasaun vulnerável sira.

Diretora Nasionál PNDS, Claudina Soares Pinto hateten, atividade implementasaun uma kbiit la’ek iha Timor-Leste hamutuk 1.254 ba iha suku 424.

“Husi totál 1.254 ne’e, ita konsege konstrui ona iha territóriu Timor laran tomak nia persentajen 55% implementadu ona, falta de’it uma hamutuk 62 mak sei iha faze preparasaun par atu bele implementa iha faze tuir mai. Uma kbiit la’ek ida-ne’e hanesan ohin ha’u mensiona katak, ita halo iha 424 sukus bá iha 424 aldeia, enfelizmente iha Munisípiu Dili de’it mak halo iha postu rua de’it hanesan Ataúro ho Metinaro,” dehan Diretór Nasionál PNDS, Claudina Soares, hafoin remata enkontru ho PM Taur iha rezidénsia Farol, Dili, Segunda ne’e.

Atividade konstrusaun uma kbiit la’ek ne’e hala’o iha Munisípiu 12 inklui Rejiaun Administrativa Espesiál Oe-cusse Ambenu (RAEOA), no suku ida no aldeia ida uma tolu.

“424 aldeia sei rezulta 20.25 aldeia, entaun ita sei implementa fazeadamente husi 20.25 aldeia sé enkuantu ita mantein ho implementasaun hanesan agora 3 kazas aldeia ida fi’ar katak, até 2025 aldeia hotu-hotu sei hetan oportunidade par bele hetan uma kbiit la’ek iha territóriu Timor laran tomak,” Claudina esplika.

Tanba ne’e, Claudina Soares Pinto garante katak, uma kbiit la’ek ne’e iha kualidade di’ak, tanba uma refere la’ós halo husi kompañia sira, maibé komunidade sira mak sai na’in mak obra ne’e rasik.

Entretantu, konstrusaun uma kbiit la’ek ne’e, balun hetan ona inaugurasaun husi Ministru MAE, Miguel Perreira de Carvalho, iha Munisípiu tolu hanesan, Munisípiu Manufahi, Aileu no Likisá, no benefisiáriu sira hahú hela ona uma refere.(ant)