Konfrontu Entre Estudante Iha Becora, Professór Ida Kanek, Autór Kapturadu

Smnewstl.com 29-11-2021 (Dili) – Polísia Nasionál Timor-Leste (PNTL) liu husi Eskuádra Cris Rei konsege kaptura autór ida ne’ebé diskonfia involve iha kazu konfrontu entre estudante sira husi eskola 12 Novembru ho 5 de Maiu iha Becora foin lalais ne’e, iha ne’ebé insidente ne’e rezulta mós professór ida hetan kanek.

Komandante Polísia Munisípiu Dili, Superintendente Xefe Henrique da Costa konfirma, iha loron hirak bá kotuk, mosu insidente iha kapitál Dili, no insidente ne’e involve estudante sira husi Eskola Sekundáriu 4 Setembru UNAMET Balide ho Nobel da Páz, Estudante Eskola 12 Novembru ho 5 de Maiu, estudante eskola Finantil ho estudante husi 10 de Dezembru Comoro, insidente ne’e akontese , bainhira izame terseiru periódu nian remata.

“Iha loron hira bá kotuk, iha insidente ne’ebé mak involve estudante sira mak hanesan iha eskola SMA 4, eskola Nobel da Páz, iha Becora nian ho Dom Aleixo nian,” dehan Superintendente Xefe Henrique da Costa, iha knár fatin Komandu Polísia Munisípiu Dili, Segunda ne’e.

Konfrontu entre estudante sira iha Becora ne’e, Polísia Eskuádra Cris Rei ne’ebé hetan apoiu husi forsa rezerva, konsege kaptura autór ida, no daduak ne’e submete ona prosesu investigasaun.

“Iha Becora nian, ita-nia patrulla Cristo Rei kaptura autór ida lori bá edifísiu hodi halo prosesu ne’ebé mak involve mós professór ida kanek, prosesu ne’e iha hela investigasaun Cristo Rei agora sira kontinua halo prosesu,” informa Henrique.

Hafoin akontese, Henrique da Costa dehan, Komandu Polísia Munisípiu Dili koordena kedas ho Diretór eskola sira atu foti medidas ruma, nune’e buka solusaun no evita konflitu hanesan labele akontese tan iha futuru.

“Medidas ne’e mak ita halo, ita komunika kedas ho parte Diretór eskola sira, par atu nune’e, sira mós bele fó solusaun ruma bá insidente ne’e, sé karik mak alunus sira laiha atividade, bele fó feriadu bá sira ga sira halo atividade ruma liu husi uma de’it, atu nune’e evita kontinuasaun problema ne’e,” dehan nia.

Maski nune’e, Superintendente Xefe ne’e afirma, Komandu PNTL mós koloka ona Ofisiál Polísia Eskola (OPE) iha kada eskola sira, no mós hetan apoiu husi ekipa patrullamentu, nune’e bele kontrola di’ak e.

Iha okaziaun ne’e, Komandante Polísia Munisípiu Dili ne’e mós apela bá estudante sira, atu para halo problema iha eskola, tanba eskola fatin atu aprende no la’ós atu tuku malu. Husu mós estudante sira atu aproveita fatin eskola ne’e hodi aprende netik buat ruma husi professores sira, nune’e labele fó impaktu bá futuru ida-idak nian.(ant)