Konferénsia Xefe Estadu no Governu CPLP Foka Liu Bá Juventude Sustentabilidade

Smnewstl.com – Konferénsia Xefe Estadu no Governu Comunidade dos Países da Língua Portuguesa (CPLP) bá dala XIV ne’ebé hala’o iha São Tomé e Príncipe ne’e, foka liu kona-ba juventude sustentabilidade nu’udar tema sentrál São Tomé e Príncipe aposta durante assume pasta hanesan Prezidénsia Rotativa CPLP periódu 2025-2027.

Prezidente Parlamentu Nasionál (PPN), nu’udar mós Enviadu Espesial Prezidente Repúblika, Maria Fernanda Lay konsidera, tema ne’ebé São Tomé e Príncipe foti kona-ba “Juventude Sustentabilidade” ne’e relevante tebes bá Timor-Leste iha situasaun atual.

“Ha’u hanoin tema juventude ho sustentabilidade iha mós relevánsia bá Timor-Leste, tanba iha ne’ebá ko’alia sobre assuntus sosiais, mudansa klimátika ho ekonomia,”

“Klaru katak, ita mós iha problema kampu traballu, ha’u hanoin ita bele aproveita oportunidade ida-ne’e bainhira estadus membrus, ita mós tenki promove ita-nia problemas hanesan ha’u mensiona iha ha’u-nia diskursu,” hateten Prezidente Fernanda Lay.

Nia hatutan, Timor-Leste iha ona akórdu entre Governu ho Governu kona-ba mobilidade laboral ho nasaun sira hanesan, Austrália, Korea do Súl hodi haruka joven sira bá servisu.

Entretantu, simeira Xefe Estadu no Governu CPLP bá dala XIV ne’e, deside ona nasaun Guiné Bissau mak sei assume fali Prezidénsia Rotativa CPLP protémpore periódu 2025-2027.

Iha okaziaun ne’e, Prezidente Repúblika Angola, João Lourenço, ofisiamente entre Prezidénsia Rotativa CPLP Protémpore bá Prezidente Repúblika São Tomé e Príncipe, Carlos Vila Nova, tanba São Tomé mak sei lidera CPLP bá tinan rua 2023-2025.

Entretantu, delegasaun husi Timor-Leste ne’ebé partisipa iha simeira Xefe Estadu no Governu CPLP bá dala XIV ne’e, Ministru Negósiu Estranjeiru no Kooperasaun (MNEK), Bendito dos Santos Freitas, Xefe Missaun Permanente Junta CPLP, Embaixadora Marina Ribeiro Alkatiri no seluk tan. (Smnews)