Komunidade Musulmanu 8000 Resin Iha TL Sei Komemora Loron Idul Adha Bá Dala-1442 Hizriah

Smnewstl.com Media Online — Komunidade musulmanu iha Timor-Leste, Tersa-feira loron 20 fulan-Jullu tinan 2021 sei komemora loron idul adha bá dala 1442 Hizriah iha Timór inklui mundu tomak.

Vise Prezidente Komunidade Musulmanu iha Timor-Leste, Abdullah Inácio António Soares esplika, objetivu husi komemorasaun loron idul adha ne’e, nu’udar dutrina sarani musulmanu sira-nian hodi halo orasaun bá profeta Abrão ne’ebé liu husi teste nia oan mane Ismael atu fó fi’ar no domin bá maromak.

“Ne’e 1442H, maknah husi idul adha ne’e hanesan lisaun ou dutrina ida bá ami liu husi ami-nia profeta Abrão liu husi teste ne’ebé makas husi nia oan mane profeta Ismael oinsá atu fó fi’ar, fó laran no domin bá na’i Maromak to’o iha Musulmanu mundu tomak,” dehan Vise Prezidente Komunidade Musulmanu iha Timor-Leste, Abdullah Inácio, Segunda (19/07/21) iha Masjid Annur, Dili.

Abdullah Inácio hatutan, komemorasaun idul adha ne’e, kada tinan, komunidade musulmanu sira sempre oho karau hewan qurban, ne’ebé oferese husi estadu Timor-Leste, nune’e depois de reza hotu sei fahe bá ema kbiit laek sira.

“Depois de ami halo iha haji nian liu tiha loron 10 ami selebra idul adha bá komunidade sira-ne’ebé seidauk iha kapasidade par atu viajen bá sa’e haji sira bele liu husi hewan qurban, hodi kontribui bá komunidade ne’ebé laiha kapasidade, maibé ami-nia viziñu sira iha ne’e mós ami sempre fahe mesmu ké la’ós Musulmanu,” tenik nia.

Abdullah relasa, Prezidente Repúblika, Francisco Guterres Lú-olo oferese ona karau ida, eis Primeiru-Ministru, Marí Alkatiri mós fó apoiu ona karau ida.

“Iha ne’e partisipa mós husi ita-nia Prezidente RDTL ohin dader lori karau ida mai, no mós Señór Marí Alkatiri horseik lori mai, agora dadauk ami sei hein tan Prezidente Parlamentu no mós husi Primeiru-Ministru,” subliña nia.

Vise Prezidente musulmanu ne’e afirma, komemorasaun idul adha ne’e realiza, servisu hamutuk ho parte saúde, nune’e bele garante no kumpre nafatin protokolu Covid-19 ne’ebé Ministériu Saúde no organizasaun mundiál saúde fó sai ona.

Tuir dadus ne’ebé iha ne’ebé iha, sarani musulmanu iha Timor-Leste hamutuk 8000-resin mak.

Alem de ne’e, amu lulik katólika balun, no mós madre balun, fó ona sira-nia votus kongratulasaun bá komunidade musulmanu sira ne’ebé komemora loron idul adha bá dala 1442H iha Timor-Leste no mundu tomak.(ant)