Komunidade Kuluhun Hetan Bomba Segunda Guerra Mundiál Ida, Ekipa EOD Destroi Iha Kaitehu

Smnewstl.com 14-12-21 (Dili) — Komunidade iha aldeia 03 suku Kulunhun de Baixo suku postu administrativu Cristo-rei munisípiu Dili, kuarta semana kotuk, hetan bomba funu segunda guerra mundiá ida nian ne’ebé seidauk rebenta.

Hafoin hetan, komunidade sira informa kedas bá Polísia, no iha loron kinta-feira semana kotuk, Polísia Nasionál Timor-Leste (PNTL) liu husi ekipa EOD-UEP tun kedas iha fatin hodi asegura kedas, no husu komunidade sira atu labele besik, tanba ne’e, sei fó impaktu bá komunidade nia vida.

Nune’e, iha tersa-feira ohin, ekipa EOD bá foti kedas bomba ne’e, hodi lori bá halo destroisaun iha Kaitehu Tibar Munisípiu Likisá.

Porta-voz PNTL, Superintendente Xefe Arnaldo de Araújo hateten, ne’e nia todan, luan no naruk hamutuk 200 resin, tan ne’e, bainhira rebenta sei fó ameasa boot bá komunidade ne’ebé hela besik sira-nia vida.

Tan ne’e, ekipa EOD urjentemente foti kedas hodi lori bá halo destroisaun iha Kaitehu Munisípiu Likisá.

“Enatun ho ida-ne’e, urjentemente EOD ekipa husi seksaun UEP nian marka prezensa iha ne’e atu bele foti sasán ida-ne’e atu bele loiri bá so’eiha kaitehu, maibé ho nia velosidade ho nia lian ne’e makas teb-tebes ema labele bá besik, bainhira EOD rebente bá sasán ida-ne’e. Iha ne’e bu’at hotu sei di’ak hela, kuandu ita la hatene nia maneira atu book nia bele rebenta,” dehan Superintendente Xefe Arnaldo de Araújo, iha Kuluhun, Dili, Tersa ne’e.

Sorin seluk, Xefe EOD Xefe Sarjentu Xefe, Estaquio de Jesus Ximenes hateten, bomba ne’e aviaun nian ho todan 20 paun, tan ne’e sira bele hit ho liman, maibé tenki uza ekipamentu pezadu atu bele hit ho didi’ak atu labele rebenta.

“Desde kinta-feira dader ami rona informasaun loraik ami mai kedas iha ne’e, mais tuir informasaun katak, komunidade sira hetan iha kuarta-feira, entaun kinta-feira ne’e ami mai kedas iha ne’e asegura, soke ida-ne’e bomba aviaun ne’ebé boot, nia todan ne’e pelu menus to’o 20 paun hanesan ne’e, ne’ebé ita labele hit ho liman, entaun ita presiza ekipamentu pezadus sira bele apoiu ita par bele hit ho kuidadu, tanba buat ne’e ita kategoria hanesan unexploded ordinary,” dehan Xefe Sarjentu , Estaquio de Jesus Ximenes.

Nia hatutan, bomba ne’e furejin ona, tan ne’e labele atu halo investigasaun hodi bele hatene bomba orijinalidade husi bomba ne’e nian.

“Kuandu nia sei foun ita bele haree iha ninia generel propose ita bele hatene nia perigu iha ne’ebé, husi orijen nasaun ne’ebé. Maibé nia tama ona iha furejin hanesan ne’e unexploded ordinary, entaun ita labele identifika katak, nia orijen ne’ebé, nia perigu ne’ebé, maibé, ita konsidera unexploded ne’e perigu la halimar, tanba ninia safety ne’e ita labele identifika ona, entaun ida-ne’e ita kuidadu par bele asegura, kuantu mais ida-ne’e iha komunidade nia le’et fó perigu,” dehan nia.

Xefe Sarjentu EOD ne’e mós preukupa, tanba ekipamentu protesaun hodi halo destroisaun bá bomba refere to’o oras ne’e seidauk iha, tan ne’e, sei fó impaktu bá ekipa EOD sira bainhira atu destroi msteriál funu ruma.

Maske ho ekipamentu ne’ebé mínimu, nia afirma, sira buka meius hotu atu bele asegura no halo destroisaun bá bomba ne’e, nunue’e labele fó impaktu bá komunidade sira.(ant)