Kompañia Segerau Hatene Deit Sobu, Semana Ida Ona Abandona Konstrusaun Ponte Perumnas-Ailoklaran

Smnewstl.com 15-11-2021 (Dili) – Semana ida ona mak kompañia Segerau Unipessoal Lda abandona hela projetu konstrusaun bá Ponte Perumnas ligasaun Ailok-Laran.

Liu husi prosesu tenderizasaun, Komisaun Nasionál Aprovizionamentu (CNA) fó fi’ar bá kompañia refere atu ezekuta projetu konstrusaun ponte diresaun Perumnas-Ailok-Laran.

Iha Tersa-feira (09-11-21) semana kotuk, kompañia Segerau mobiliza kedas ekipamentu pezadu bá ke’e sai manila ne’ebé antes ne’e liu husi orientasaun Ministru Obras Públikas (MOP) nian bá kompañia Salimagu hodi monta provisorio nune’e fasilita movimentasaun transporte públiku inklui komunidade sira.

Hafoin hetan fiar hodi halo kontrusaun ba Ponte refere to’o oras ne’e rasik Kompanha Segerau seidauk executa nia servisu maske ke’e sai tia ona Manila nune’e difikulta tebes movimentu publiku li-liu transporte tamba laiha dalan alternativu.

Tuir informasaun ne’ebé Smnewstl.com asesu komfirma, liu husi prosesu tenderizasaun, CNA fó fi’ar bá kompañia Segerau Unipessoal Lda maka ezekuta projeitu ne’ebe kauza husi kalamidade públika iha loron, 4 Abríl liu bá.

Konstrusaun bá ponte refere ho montante orsamentu hamutuk $24.000 resin, no projetu ne’e hahú iha fulan Setembru no sei remata iha Dezembru 2021.

Hare ba situasaun ne’e, Júlio Soares, komunidade husi Ailok-Laran konsidera, kompañia la hatudo nia esperito servisu tamba hatene ke’e, maibe la buka oinsa atu fasilita ema ema nia movinentu.

Lori komunidade Ailoklaran, Julio husu ba Ministerio Obras Publiku atu subtitui fali projeitu ne’e ba kompanha seluk ne’ebe konsidera iha kapasidade ba executa nune’e la impede ema nia atividade li-liu movimentu transporte publiku.

“Ami lamenta teebs ho servisu kompañia ne’e, dalaruma kompañia ne’e osan laiha, ne’e mak ke’e hotu tia husik hela deit. Di’ak liu maka fó fali ba kompañia ne’ebé iha osan mak halo de’it, nune’e labele halo komunidade sira terus liu husi mota laran hodi la fo perigu ba vida li-liu iha tempu udan.

Ponte refere hetan estragus husi kalamidade públika iha loron, 4 Abríl, no hetan ona vizita husi Primeiru-Ministru (PM), Taur Matan Ruak, Vise PM no Ministru Planu Ordenamentu, José Maria dos Reis no mós Ministru MOP, Salvador Pires.

To’o informasaun ne’e fo sai parte kompanha inklui Ministro Obras Publiku ne’ebe hanesan nain ba projeitu seidauk aprezenta pozisaun.(ant)