Komemorasaun 28 Novembru Iha Dili, Guilhermina Husu ba Jovens Atu Hakribi Violénsia

Smnewstl.com 28-11-2021 (Dili) – Prezidente Autoridade Munisípiu (PAM) Dili, Guilhermina Filomena Saldanha Ribeiro husu joven sira atu kria páz no establidade iha Munisípiu Dili, tanba Dili mak sai nu’udar kapitál nasaun nian.

Guilhermina transmite mensagen ne’e hafoin partisipa iha serimónia proklamasaun independénsia unilateral 28 Novembru bá dala-46 ne’ebé hala’o iha resintu Administrasaun Munisípiu Dili.

“Tema nasonál ne’ebé foti, ‘A União e a Luta Conjunta Para Vitória de Todos’ ne’e husu hotu-hotu atu tau ita-nia unidade hamutuk hases buat, atu nune’e ita hotu hamutuk lori bá vitória. Vitória ne’e barak, vitória atu hamenus ki’ak, vitória oinsá ita atu sai sidadaun nu’udar kapitál nasaun, uniaun ida mós mak ita atu despreza violénsia, ódiu ka’er metin páz no hametin ita-nia seguransa,” dehan PAM Dili ne’e.

Tema bá selebrasaun 28 Novembru bá dala-46 ne’e mak ‘A União e a Luta Conjunta Para Vitória de Todos’.

Tan ne’e, Prezidente Autoridade Munisípiu Dili ne’e mós husu joven sira, atu banati tuir espíriti erói sira-nian durante luta bá ukun rasik aan Timor-Leste nian, liu husi hametin páz no estabilidade hodi kontribui bá prosesu dezenvolvimentu nasionál.

“Ha’u husu bá joven sira atu ka’er espíritu ita-nia erói sira ne’ebé mak mate, sira hamutuk hakarak de’it ukun rasik aan, ukun rasik aan sira fó sira-nia aan bá mate, maibé, ha’u la husu joven sira atu fó aan bá mate, hamutuk despreza violénsia entre joven ho joven liu-liu hakribi violénsia ida-ne’e, ka’er metin unidade, ka’er metin maromak nia ukun fuan katak, mai ita hadomi malu,” apela Guilhermina.

Nia mós husu joven feto no mane atu respeita malu no fó liman bá malu hodi hametin unidade iha kualkér organizasaun, tanba unidade de’it mak bele kria situasaun hakmatek iha sosiedade laran no nasaun.(ant)