Komandu Orienta UPF Intensifika Kontrolu Importasaun Fugete Husi Fronteira

Smnewstl.com 16-11-2021 (Dili) – Komandante Jerál Polísia Nasionál Timor-Leste (PNTL), Komisáriu Faustino da Costa hatun ona diretiva bá Komandu Unidade Patrullamentu Fronteira (UPF) atu intensifika kontrolu iha fronteira hodi evita fugetes mai Timor-Leste.

Diretiva Komandu PNTL ne’e hatun, bainhira hala’o enkontru avaliasaun jerál ho Komandante Polísia Munisípiu, Unidade no Xefe Departamentu sira iha komandu PNTL laran.

“Bá natál ho tinan foun diretiva ne’ebé komandu hasai ona liga bá atividades preventivas ne’e mak hahú parajen estrada ka check point no mós check mós sasán sira-ne’ebé tama husi raiketan mai. Ita lakoi atu mosu buat ruma ne’ebé ita la espera iha eventu loron boot hanesan natál no mós tinan foun ne’e, inklui intensaun bá sasán (fugetes),” dehan Komisáriu Faustino da Costa, iha Komandu PNTL, Dili, Tersa-feira ne’e.

Sorin seluk, Komandante Unidade Patrullamentu Fronteira (UPF), Superintendente Enclides Belo hateten, UPF kumpre nafatin ninia missaun tuir orientasaun lei orgánika PNTL nian.

Maske UPF lakon membru ida Segundu Komandante Kompañia Bravo, Assistente Inspetór Norberto Mendonça Cardoso, iha 11 no halot ona iha dia 14 fulan Novembru liu bá.

Maibé, UPF nafatin koordena ho Komandu Polísia Munisípiu tolu hanesan, Bobonaru, Covalima no Oe-cusse, hodi halo operasaun iha liña fronteriza, iha ne’ebé konsege kaptura sidadaun 12 ne’ebé tama ilegál iha fronteira.

“Embora ida-ne’e, ami mós nafatin halo operasaun ho Komandu Munisípiu tolu, tanba ne’e mak iha semana-rua nia laran husi dia 1 fulan Novembru to’o dia 15 fulan Novembru, UPF kaptura sidadaun hamutuk na’in 12. Sidadaun na’in 12 ita kaptura ho justifikasaun na’in 2 sidadaun timoroan estudante no aprezenta aan bá postu UPF,” dehan Euclides Belo.

Entre sidadaun na’in 12 ne’e, sidadaun na’in 7 mak halo transaksaun diretamente ilegál na’in 7, no na’in 3 mak halo vizita família.

Sidadaun na’in 12 ne’e, UPF entrega kedas bá sala situasuan sentru integradu jestaun krize iha Mota-ain, nune’e submete bá kuarentena.(ant)