Komando Geral PNTL Hahu Tinan Foun ho Rotasaun Servisu,  António de Sá Lidera Baucau, Basílio Suai

Smnewstl.com 03-01-22 (Dili) — Komandante Jerál Polísia Nasionál Timor-Leste (PNTL), Komisáriu Faustino da Costa hahu servisu tinan foun 2022 ho rotasaun servisu ba komandante polísia Munisípiu ho Unidade sira.

Komandante PNTL Munisípiu Covalima Sesante, Superintendente Xefe António Maria de Sá troka Komandante Sesante Munisípiu Baucau, Superintendente Xefe Armando Monteiro.

Komandante Armando Monteiro troka Komandante Relasaun Públika PNTL, Superintendente Xefe Arnaldo de Araújo. Enkuantu Komandante Arnaldo de Araújo muda bá komandante Relasaun Internasionál PNTL nian.

Nune’e mós, Komandante UPM Sesante, Superintendente Assistente Basílio de Jesus, asume fali kargu nu’udar Komandante PNTL Munisípiu Covalima, hodi troka fali Komandante António Maria de Sá.

Enkuantu, atuál Segundu Komandante UPM, Inspitor Xefe, João Cesar da Silva, assume fali kargu Komadante UPM no Komadante sesante Operasaun UPM, Inspitor Xefe, Aniceto Fátima assume fali kargu hanesan Segundu Komadante UPM.

Iha serimónia tomada de posse, Komandante Jerál PNTL, Komisáriu Faustino da Costa informa, Komandu PNTL halo rotasaun bá komandante Munisípiu no unidade sira, ne’ebé inklui mós inspetór sira lidera unidade sira, tanba nesessidade operasaun no instituisaun nian.

“Ita haree situasuan rua, nesessidades operasaun, situasuan ida nesessidades instituisaun, buat rua ne’e importante tebes. Agora sé dehan katak, Inspetór Xefe ida assume kargu ida bele ga la’e.? Ema ne’e durante tinan barak hala’o servisu iha área ne’ebá,” dehan Komandante Jerál PNTL, Komisáriu Faustino da Costa, iha Komandu PNTL, Dili. Segunda ne’e.

Komisáriu PNTL ne’e afirma, Inspetór Xefe, João Cesar da Silva, bele ona atu lidera UPM, hala’o servisu nu’udar Segundu Komandante iha UPM, no mós tuir ona kursu formasaun promosaun ofisiais no superiór PNTL nian.

“Sé ho situasuan ida hanesan ohin temi kona-ba atividade lubuk ida PNTL sei hasoru iha tinan ida-ne’e, depois ita tau ema ne’ebé foun iha situasuan ida-ne’e, ha’u hanoin la’ós nesessidades atu rezolve problema. Ita tau ida-ne’ebé iha ona esperiénsia servisu iha ne’ebá depois servisu rezolve,” tenke nia.

Faustino da Costa relata tan katak, kondisaun saúde Komandante PNTL Sesante Munisípiu Baucau, Superintendente Xefe Armando Monteiro nian la estável, tan ne’e Komandu deside muda mai Komandu, nune’e bele halo tratamentu saúde.

Entretantu, iha serimónia tomada de posse ne’e, Komandante PNTL Munisípiu Covalima foun, Superintendente Assistente Basílio de Jesus la partisipa, tanba kestaun saúde.

Maibé, maske la partisipa mós, Superintendente Assistente Basílio de Jesus nomeadu nafatin bá Komandante PNTL Munisípiu Covalima nian.

Empossadu sira-ne’e, hahú dia 1 Janeiru 2022, ofisialmente hala’o ona sira-nia funsaun hanesan komandante Munisípiu no unidade ne’ebé komandu koloka ona.(ant)