KHUNTO-CNRT ´Hadau Malu` Ró Berlin-Ramelau

Smnewstl.com 10-12-21(Dili) – Bankada Partidu Klibur Haburas Unidade Nasionál Timor Oan (KHUNTO) ho Bankada Partidu Congressu Nasionál Rekonstrusaun Timor (CNRT) ´hadau malu´ ró Berlin-Ramelau ne´ebé dadauk ne´e to´o ona iha Timor-Leste.

Ró Berlin-Ramelau to´o loron 9 fulan Dezembru kalan, nune´e iha loron 10 fulan Dezembru iha tuku 10 dader foin atraka bá Portu Dili, hodi simu matak malirin husi lia na´in Karketu Mota-ain Dili, tuir lisan no kultura Timor nian.

Hafoin to´o, Prezidente Bankada KHUNTO, Deputada Olinda Guterres fó parabéns bá Ministru Transporte Komunikasaun (MTK), José Agostinho da Silva, ne´ebé halo esforsu lubuk hodi ró Berlin-Ramelau to´o iha Timor-Leste.

“Ha´u atu fó parabéns bá Ministru Transporte Komunikasaun katak, iha momentu ne´ebá han-malu ho ha´u iha ne’e dehan katak, ha´u tama korrupsaun, maibé oras ne´e dadauk ró sadere tiha ona mai ita-nia rain Timor-Leste,” dehan deputada Olinda Guterres, iha Plenária Parlamentu Nasionál, Sesta-feira ne´e.

Olinda Guterres husu ba Ministru José Agostinho, atu fó autorizasaun hodi ró Berlin-Ramelau tula uluk Deputadu Bnakada CNRT, Domingos de Carvalho ´Maudokar´ haleu iha tasi-ibun.

“Sé bele karik husu Ministru Transporte Komunikasaun atu ida horbanhira baku ha´u kona-ba ró ne´e tula uluk nia bá pasear iha tasi-ibun lai, señór Domingos Maudukur, han malu ho ha´u tanba de´it dehan, ha´u tama korrupsaun,” dehan Olida.

Hatán bá deklarasaun Deputadu bankada CNRT, Domingos de Carvalho defende katak, Deputada Olinda Guterres ko´alia hanesan fahi tama Timor Plaza, tanba inísiu konstrusaun bá ró Berlin-Ramelau asina husi eis Ministru Prezidénsia Konsellu Ministru husi partidu CNRT, Agio Perreira.

“Ró Berlin-Ramelau ne´e tempu anteriór nian, ne´e la´ós governasaun ida agora mak bá halo kontratu bá ró ne´e hodi tama mai la´e, señór Primeiru-Ministru diskulpa mais, ne´e la´ós ita-boot nia governasaun mak ró ne´e, uluk Agio Perreira mak asima ho governu alemaña hodi ró ne´e horseik mai atraka, ne´ebé señóra deputada Olinda, ita-boot ne´e hanesan fahi tama plaza,” dehan Deputadu Domingos.

Nia dehan, rajaun nia dehan deputada Olinda Guterres hanesan fahi tama plaza, tanba ema ko´alia assuntu seluk, maibé nia halai fali bá buat seluk ida.

Alem de ne’e, ró refere mós sei tula pasajeiru hamutuk na’in 350 resin, ho kareta hamutuk 15, no ró Berlim Ramelau diferente ho ró sira seluk, tanba ró refere iha mós fatin bá ema ho difisiensia, fatin tau mate, no seluk tan.

Ró Berlin-Ramelau lansa ona ba tasi-leten ba dahuluk iha segunda (10/5) ne’e iha Xína, nu’udar ró daruak hodi fasilita pasajeiru nasionál iha Timor-Leste atu halo viájen, tuir informasaun ne’ebé divulga hosi Gabinete Primeiru-Ministru ohin (11/5).

Projetu konstrusaun ró daruak Berlin-Ramelau ne’e halo iha Xina, ho largura metru 16, kaladu metru 3,3, komprimentu metro 67,3, altura metru 4,8 no sei atinje velosidade maximu nós 10 to’o 12. Ró ne’e nia konstrusaun kofinansia hosi Governu Timor-Leste no Governu Repúblika Federál Alemaña. Ró foun ne’e tuir planu sei substitui ró Nakroma, no nia iha kapasidade atu transporta ema liu 380.

Berlin-Ramelau nia prosesu konstrusaun atinje ona pursentu 85 (85%), no preve hela katak sei halo teste finál no aprovasaun téknika iha fulan jullu tinan ida ne’e iha Shangai, Xina, no sei entrega ba Governu Timor-Leste iha Setembru.

Iha serimónia lansamentu dahuluk Berlin-Ramelau ba tasi ne’e partisipa mós hosi Embaixadór Timor-Leste iha Xína Abrão dos Santos no Embaixadór Alemaña ba Xína.

Ró Berlin-Ramelau to´o Timor-Leste iha loron 09 fulan Dezembru iha tukun 7 kalan, maibé atraka iha Portu Dili, tanba kalan ona, nune´e iha loron 10 fulan Dezembru iha tuku 10 dader ne´e.

Hafoin to´o, lia na´in sira husi Karketu Mota-ain, halo tuir sermónia rituál tuir tradisaun no kultura Timor-Leste nian, no mós médiku sira halo desinfekta no mós halo teste PCR, atu bele hatene kondisaun saúde husi tripulantes sira nian, hafoin parte imigrasaun halo pasarevista bá dokumentu sira.(ant)