KET Dioseze Dili Hatama Pedidu Bá MESSK Harii UKT

Smnewstl.com Media Online — Komferénsia Episkopal Timorense (KET) lideradu Archebispo Metropolitanu Dioseze Dili, Dom Virgílio do Carmo da Silva ho ekipa submete ona pedidu bá Ministériu Ensinu superiór, Siénsia no Kultura (MESSK) atu hahú abertura bá prosesu estabelesimentu Universidade Katólika Timorense (UKT).

Archebispo Metropolitanu Dioseze Dili, Dom Virgílio do Carmo da Silva hateten, planu atu harii UKT ne’e la’ós nia mehi, maibé mai husi Dom Carlos Filipe Ximenes Belo, no kontinua husi matebian Dom Alberto Ricardo da Silva, maibé la konsege harii UKT to’o na’i Maromak bolu.

Nune’e Dom Virgílio hatutan, agora nia tenki dudu prosesu ne’e bá oin, nune’e bele realiza mehi ne’ebé nia predesesor sira husik hela.

“Ha’u mai tanba ami-nia dever atu entrega dokumentu hodi submete bá regras hotu ne’ebé ensinu superiór fó atu bele hahú loke universidade katólika ninian. Universidade ida-ne’e la’ós ha’u ninia mehi, la’ós ha’u-nia hakarak, maibé universidade ida-ne’e, hahú mosu kuaze dékade rua bá kotuk, hahú kedas tempu Dom Carlos Filipe nian, nia hahú forma ona ekipa ida hodi halo estudu viabilidade to’o Dom Alberto Ricardo nian, nia mós koko atu hahú tau infraestrutura ruma depois la konsege, tanba na’i Maromak bolu,” dehan Dom Virgílio do Carmo, iha salaun MESSK kolmera, Dili. Sesta (16/07/21).

Dioseze Dili hahú submete proposta bá MESSK iha loron 19 fulan-marsu tinan 2021 ne’ebé koinsidénsia ho São José, atu hahú halo abertura bá prosesu loke eskola UKT ne’e.

“Depois abertura prosesu durante fulan hira nia laran, ekipa instaladora servisu makas i ami determina fila-fali ohin dia 16 de Jullu hodi mai entrega hotu tuir padraun ne’ebé instituisaun husu atu hodi loke universidade katólika Timorense ne’ebé ita hanaran UCT,” tenik Dom Virgílio.

Líder Igreja Katólika Timor-Leste ne’e dehan, UKT sei substitui fali Institutu Siénsia Relijioza (ICR), bainhira UKT hahú ona prosesu apredijajen.

“Ami hahú hodi halo tranzisaun husi estudu siénsia relijioza ICR ne’ebé uluk Indonézia nian IPI akreditadu ona graduasaun lubuk ida tiha ona, entaun ami hakarak eleva liután nível ida-ne’e husi institutu siénsia relijioza ne’e hodi halo bá fali universidade, ne’eduni sé karik Outubru loke duni, ICR ne’e hela fali iha mahon universidade nian,” subliña nia.

Entretantu, kampus UKT sei sentraliza uluk iha munisípiu Dili iha São José Balide, no bá futuru bele loke munisípiu seluk.

Iha faze inísiu, UKT sei hahú ho fakuldade ha’at (4) ne’ebé kompostu husi fakuldade siénsia sosiál liu-liu foka bá area edukasaun, língua portugeza no arte.

Maibé bá futuru, UKT sei loke tan fakuldade seluk hanesan, siénsia umanu, siénsia médikas no enjeñaria agríkola.

UKT mós prepara ona rekursu umanus liu-liu dosentes hamutuk na’in-50, balun Timoroan no balun estrajeiru ne’ebé sei hanorin iha UKT.(ant)