Keixa ba Tribunal, Aitahan Matak : “Hau Pronto Atu Hata’an”

Smnewstl 05-11-2021 (Dili) – Juventude Covalima oan ne’ebé involve iha grupu Ekipa Servisu Covalima Vitória Ho Domin-20 (EKSES-COVID-20) amesa sei keixa Antonio Aitahan Matak bá Tribunal relasiona ho ninia publikasaun iha media sosiál.

Tuir publikasaun Antonio Aitahan Matak dehan Covalima oan mak uza ‘virus pakit’ hodi hamate Dom Basílio do Nascimento konsideradu hanesan insutlu bo’ot ida.

Porta-voz, EKSES-COVID-20, Rosário Doloroso Ximenes afirma, liafuan ne’ebé António Aitahan Matak mensiona ofende no nega sira nudar Covalima oan, la’ós ema Timor.

“Nu’udar Covalima oan la satisfeitu ho señór António Aitahan Matak nia stetimentu ne’ebé mak hatudu la respeita no halo defamasaun bá povu Covalima iha públiku. Ami povu Covalima ejize bá señór António Aitahan Matak, atu responsabiliza stetmentu ne’ebé publika iha loron, 30 outubru 2021 liu husi media sosiál,” dehan Rosário Doloroso Ximenes, liu husi komferénsia imprensa iha sede RENETIL Farol, Dili, sesta ne’e.

Fatin hanesan, Mário Tilman hanesan mós Covalima oan afirma, bainhira António Aitahan Matak la responsabiliza bá nia publikasaun ne’e maka sira sei hato’o keixa bá ministériu públiku atu prosesu.

“Kona-ba ida-ne’e, primeiru ami atu hatán de’it stetmentu señór António Aitahan Matak nian, sé karik bá oin tuir saida mak ami deklara ona, señór António Aitahan Matak la responsabiliza nia stetmentu sira-ne’e ami sei la nonok, tanba ami temi mós ministériu públiku, sé ida-ne’e loke dalan bá to’o iha ne’ebá, ami sei hakat to’o iha jalur hokum ninian,” deklara Mário.

Hatán bá preukupasaun ne’e, António Aitahan Matak deklara, prontu bá hatán iha Tribunal bainhira veteranus, estudante no komunidade Covalima oan sira prosesa nia bá justisa, maibé husu atu prosesa tuir lei.

“Tribunál ne’e ha’u prontu lei hira artigu hira mak hatete ida-ne’e serake ha’u bá tribunal Bispu moris, ne’e kria kontradisoens atagónika i naun atagónika, buat ida la lia ita lori fali bá lia, tanba ne’e mak lalika, sé mak fomenta sira ha’u hatene, 1974-1975 mak haruka ha’u hatene, tanba ne’e tur hakmatek ita hotu husu kuitadu bá ita-nia amu, ha’u la sala, ha’u tuir lei deklarasaun universal, ha’u tuir lei konstituisaun, ha’u tuir lei dekretu, lei Portugal,” reafirma nia.

António Aitahan Matak rekoñuise, nia publika duni liafuan refere iha ninia ID facebook, maibé la refere bá populasaun Covalima, tanba, liafuan ne’ebe nia publika iha media sosiál ne’e atu buka hatene hun no abut husi moras kardiaku ne’ebé Dom Basílio enfrenta.

“La kontra buat ida, ida-ne’e la kompete bá komunidade Suai, ema ida-ne’ebé mak bulak bá hatete dehan, o buan ne’e ita-nia rain ne’ebá o la multa tiha bá ha’u, ha’u han ema iha ne’ebé.? Tanba Liafuan ida sira sente ne’e la kona-ba bá sira, sé ema ne’e mate iha kelekai, ita tenki temi rai kelekai nia naran ,” klarifika Aitahan Matak, iha nia rezidénsia Becora, Dili, sesta ne’e.

Maibé, António Aitahan Matak fó sala bá Administradór Munisípiu Covalima, tanba la halo esforsu atu evakua Bispu Dom Basílio do Nascimento lalais mai Dili hodi halo tratamentu, tanba kondisaun no fasilidade iha ospitál referral Suai laiha kondisaun.

“Entaun responsabilidade administradór ne’ebá ninian ne’e, tuir loloos kalan ne’e sira buka meius hanusa par bele lori Bispu to’o iha Dili, tanba ospitál ne’ebá ne’e buat hotu-hotu la di’ak, kondisoens mesak la di’ak, tanba ne’e mak ha’u-nia liafuan ida hateten katak, akar no abut. Sé Bispu ida iha ne’ebá mak administradór ida iha ne’ebá labele preukupa ona apalagi nia povu, ne’e nia atu preukupa hanusa par mai tula,” afirma Matak.

Entretantu, antes ne’e, Veteranus ho Administradór Munisípiu Covalima, rejeita ho deklaraun António Aitahan Matak nian, tanba akuzasaun refere laiha faktus.(ant)