Kazu Ró Tranship II, KAK Suspeita Tan Ema Balun

Smnewstl.com 17-11-2021 (Dili) – Komisaun Anti Korrupsaun (KAK) sei loke tan investigasaun bá ema lubuk ne’ebé diskonfia involve mós iha prosesu aluga ró Tranship II foin lalais ne’e.

Komisáriu KAK, Sérgio da Costa Hornai hato’o lia hirak ne’e, relasiona ho pedidu ne’ebé Autoridade Portuáriu Timor-Leste (APORTIL) submete bá KAK hodi husu pareser legál atu bele halo pagamentu bá ró Tranship II ne’ebé governu aluga ona hodi halo operasaun Dili Oe-cusse no Ataúru durante fulan rua.

Tan ne’e, Komisáriu KAK ne’e afirma, kestaun jurídika no kestaun téknika ne’ebé delibera ona bá iha autoridade judisiária kestaun ketak, tan ne’e laiha relasaun ho kestaun administrativas, tanba atu halo pagamentu, bainhira la viola trámitasaun legál ruma.

“Kestaun jurídika, kestaun téknika ne’ebé delibera ona bá iha autoridade judisiária ne’e kestaun ketak ida, kestaun administrativas kestaun ketak ida. Prosesu investigasaun sei la’o hela, sei iha ema bar-barak ita sei husu tan, pagamentu se admisível kuandu prienxe rekizitus administrativus no laiha virkulasaun bá iha trámitasaun legál bá iha kriminalidade nian,” dehan Komisáriu KAK, Sérgio Hornai, iha salaun Sentru Formasaun Polísia Comoro, Dili, Kuarta-Feira ne’e.

Sérgio Hornai rekuiñse, KAK simu duni pedidu husi APORTIL, maibé, husu atu labele ansi no husik autoridade judisiária sira atu halo servisu.

“Husik autoridade judisiária sira halo servisu, simu (pareser), maibé ha’u hatete fila-fali, ida-ne’ebé mak Indonézia nian dehan, tama iha rana hukum husik rana hukum halo nia servisu, análize ga la análize auto-partisipasaun submetidu autoridade judisiária halo servisu hela par atu halo verifikasaun ga fiskalizasaun loos ga laloos ne’e depois,” tenik nia.

Entretantu, governu liu husi Ministériu Transporte Komunikasaun (MTK), aluga ró transship II durante fulan-rua fulan juñu ho jullu hamutuk rihun $ 220.

Maibé, ho aluga ró Tranship II ne’e, hamosu polémika iha públiku, nune’e KAK ezekuta mandadu buska no apreensaun, bá iha Diresaun Nasionál Transporte Marítima (DNTM) ho APORTIL, no sira hotu dokumentu inklui invoice ne’ebé atu halo pagamentu bá ró Tranship II, maske kumpre ona sira-nia dever halo operasaun Dili Oe-cusse no Ataúro.

Nune’e, to’o oras ne’e, APORTIL seidauk halo pagamentu bá ró Tranship II, tanba seidauk hetan pareser legál husi KAK.(ant)