Kay Rala Xanana Gusmao Sente Lakon Ma’uhuno Bulerek Karathayano

smnewstl.com 24-09-2021 (Dili)-Eis Komandante Eim Xefe das Falintil, Kay Rala Xanana Gusmao sente triste no lakon tebes Jose Antonio Gomes da Costa kuinesiru Ma’uhuno Bulerek Karathayano, ne’ebe termina ona peregrinasaun iha mundo hodi ba hamutuk ho aman maromak iha nia kadunan santo lokoraik ne’e iha Hospital Nacional Guido Valadares Dili.

“Ohin hau lakon, hau nia alin ida, Má-Hunu Bulerek Karatayno, hamutuk ho ha’u, maka
Sobreviventes husi Comité Central FRETILIN, husi kedas tinan 1980,ne’ebé Reorganiza fali Resistênsia Armada, iha I Konferênsia Nasional, nebé hala’o iha Marsu tinan 1981, iha Laline.

Xanana haktuir, Iha Konferênsia ne’e, maka sira na’in rua orienta Kuadrus sira
nebé partisipa iha nebá, hodi eleje fali Membrus Komité Sentral FRETILIN foun, hanesan Nino Konis Santana, Bere Malay Laka no
selu-seluk tan, nebé mate iha funu laran no balun iha kedas fulan Setembro tinan 1981, iha Operasi Kikis, nebé inimigo hala’o iha Rejiaun Sentral.

Lere Anan Timur mós eleitu hanesan membro CCF no sai Komisáriu Politiku iha Rejiaun Haksolok/Fronteira Sul. Tha ona 1984, mak sai husi kuadru politiku no assume kargu hanesan Komandante.

Ohin loron, membros CCF husi jerasaun 1981, mak hela deit ona Komandante Lere. Husi fali jerasaun CCF 1975, nebé la rende no sei moris, maka ami na’in rua Má-Hunu ho ha’u. Maibé, ohin, Má-Hunu liu tiha ona.

Iha 1999, kompanheiru Má-Hunu hetan tiha stroke no terus, ho moras ida ne’e, to’o ohin nia husik tiha ita. Nudar Presidente Partido CNRT, hodi Partido tomak, kuadrus no militantes sira nia naran, ha’u hakarak presta ami-nia honra ba Fundador ida Partido CNRT nian.

Nudar mós Presidente Partido CNRT no nudar pessoal, ha’u hato’o sentidos pêzames ba Kompanheira Teresinha Viegas no ba família tomak husi Kompanheiro Ma-Hunu Bulerek Karatayano nian. Maromak simu hela nia iha ninia kadunan santo, hodi husu mós atu
Má-Hunu bele tau matan no akompanha ita hotu iha situasaun difisil

Veteranus Mauhuno hakotu iis iha Ospitál Naisonál Guidu Valadares (HNGV) iha tuku 5 ho balun, tanba sofre moras komplikadu.

Saudozu José António Gomes da Costa ho kódiku ‘Ma’huno Bulerek Karathayano durante ne’e hala’o tratamentu iha ICU.

Hafoin hakotu iis, família, no kolega husi nia kaben atuál Deputada bankada CNRT, Maria Terezinha Viegas, to’o kedas iha mortuáriu HNGV nian.

Hafoin hakotu iis, família deside transporta kedas saudozu nia isin mate bá iha rezidénsia matebian nian iha pantai kelapa.

Saudozu José António Gomes da Costa ho kódiku ‘Ma’huno Bulerek Karathayano hanesan Komandante FALINTIL iha tempu rezisténsia hasoru Indonézia iha tinan 1975 to’o tinan 1999.(ant)