Kay Olok Entrega Uma Digno Ida Ba Avó José no Avó Leonilde Simu Ho Haksolok

Smnewstl.com-DILI, 06 Outobro 2023- Kay Olok Kristy Sword Gusmão reprezenta Lider Istóriku, Kay Rala Xanana Gusmão entrega uma digno ida ba Avo José Ferreira Maia ho espoza Leonilde da Glori ho familia no komunidade sira simu ho haksolok iha sira nia hela fatin Aldeia Romit Bekusi, Aldeia Becora, Suku Becora, Postu Administrativu Na’I Feto, Munisipiu Dili.

Uma simples ne’e konstrui hosi ekipa Movimentu Brigada Xanana (MBX) no Unidade Asaun Progresu (UAP), hafoin iha semana kotuk liu ba Lider Istóriku hala’o vizita ba aldea refere hasoru direita avo na’in rua hodi husu halo kontrusaun ba sira nia uma ne’ebé kondisaun ladun di’ak.

Kay Olok ho kontente informa Maun Boot Xanana la partisipa iha serimónia entrega uma ne’e, tanba okupadu ho servisu barak, maibé nia reprezenta hodi haksolok hamutuk ho avo na’in rua ho komunidade sira.

“Ha’u haksolok tebes reprezenta Pay Nana mai hodi entrega uma ne’e, ha’u agradese ekipa MBX no UPA hodi tulun avo Josè no Avo Leonilde bele moris ho kontente,” tenik Kay Olok.

Fatin hanesan, Reprezenta Familia, Luis Alves lori avo na’in rua nia naran hato’o agradese ba Maun Boot Xanana no Movimentu Brigada Xanana ne’ebé voluntariu hodi finaliza uma ne’e too entrega.

Luis Alves informa, dezde Timor-Leste independensia avo na’in rua moris susar tebes no la iha ema ruma mak fó apoiu atu hadia sira nia uma, maibé derepente hetan vizita hosi Xanana hodi responde kedas sira nia preokupasaun.

“Uma ne’e aat dezde tempu Indonésia, ha’u nia maun no mana moris terus tebes, maibé maun boot Xanana mai too iha ne’e, haree no sobu duni uma ne’e hodi konstrui fila fali. Ami hakslok boot, tanba se mak halo ami haksolok no kontente, so maun Boot Xanana,” nia orgullu.

Fatin hanesan, Xefe Aldeia Romit-Becora, José Cepeda hato’o agradese ba Kay Olok reprezenta hodi entrega uma refere la haree ba ninia kuantidade boot ka kiik, importante iha mahon di’ak ba familia ne’e.

“Ami agradese ba Avo Nana delega Kay Olok nu’udar jerasaun foun mai entrega uma ne’e ba Avo José no Avo Leonilde, ami agradese tebes ba avo nia tulun ho ekipa MBX no UAP mai voluntariu halo uma ne’e la haree ba kor, tanba avo nia domin boot ba Timor laran tomak ami hotu akompaña, ami labele selu, maibé so hato’o de’it orasaun ba Na’I Maromak haraik nafatin saúde di’ak ho domin ukun nafatin forte ukun rai ne’e,” nia agradese.

Entretantu Portavos MBX-UAP, António Maia “Mezo” servisu ne’ebé sira halo hamutuk ho Maun Boot Xanana hodi lolo liman, karik domin tulun povu hirak ne’ebé presiza liu, tanba servisu ekipa ne’e hahú kedas iha loron 4 Abril 2020 too agora fó ona apoiu solidaridade no harii uma lubuk ida ona iha Timor-Leste.

Meza reforsa tan, ekipa ne’e sei kontinua hala’o nafatin s asaun solidaridade ba fatin hirak ne’ebé presiza sira kontribuisaun servisu voluntariu. (Smnews)