Kareta F-FDTL ‘Sasurut’ Lixeira Mercado Becora, Komando Loke Investigasaun

Smnewstl.com 04-10-2021 (Dili) – Xefe Estadu Maiór Jenerál Forsas Armadas, Brigadeiru Jenerál Calisto Santos ‘Coliati’ hateten, Komandu Unidade Polísia Militár loke ona investigasaun bá kazu asidente ne’ebé akontese Domingu (03-10-21) mais ou menus tuku 12 ho balun kalan.

Asidente ne’e akontese iha merkadu Becora, iha ne’ebé diskonfia membru FALINTIL Forsa Defeza Timor-Leste (F-FDTL) kondús ho kondisaun lanu no halai ho velosidade a’as nune’e lakon kontrolu hodi rezulta asidente.

Brigadeiru Jenerál Coliati afirma, liu husi prosesu investigasaun maka bele hatene kauza husi asidente ne’e.

“Sim, ne’e iha ona informasaun husi sira-nia komandu, agora Polísia Militár sei halo prosesu atu hatene kauza,”haktuir ‘Coliati’ iha kuartel unidade Polísia Militár, Quintál Boot Dili, Segunda ne’e.

Maske espalha ona informasaun balun ligado ho membru ne’ebe kondus kareta diskumfia ho kondisaun lanu, maibe Brigadeiro Jeneral ne’e nafatin mantein pozisaun hodi rearirma katak, prosesu investigasaun maka bele justifika ho lolos ninia kauza.

“Ida-ne’e ha’u seidauk hatene, tanba só depois de halo investigasaun mak foin bele hatene. Bainhira nia sala, militár iha regras, portanto iha ona Regulamentu Disiplina Militár (RDM), iha ne’ebá mak sei hatene katak, nia sala ne’e saida,” dehan nia.

Xefe Estadu Maiór Jenerál ne’e subliña, bainhira prosesu investigasaun remata mak iha indísiu forte katak, oknum refere sala, maka komandu F-FDTL sei prosesa no aplika tuir lei ne’ebé mak hakerek ona iha RDM.

Nia hatutan, pessoál refere kondutór instituisaun F-FDTL nian, tanba ne’e, nia simu orden husi nia komandu komponente terrestre atu foti kareta ne’e iha ofisina (bengkel) par depois lori fila, maibé atu fila mak hetan dezastre, tanba ne’e nia sei responde.

Membru F-FDTL ne’ebé hetan asidente iha merkadu Becora ne’e, husi komponente terrestre Metinato nian, bainhira simu orden husi nia komandu atu bá foti iha ofisina hodi lori bá Metinaro mak hetan dezastre iha dalan.

Tuir informasaun ne’ebé Smnewstl.com asesu ketak, oknum refere halo hetan tratamentu intensivu iha ICU iha Ospitál Nasionál Guidu Valadares (HNGV), tanba hetan pankada makas iha parte hirus matan ho ulun.(ant)