KAK-PNTL Reforsa Kooperasaun Kombate Korrupsaun Iha TL

Smnewstl.com 16-11-2021 (Dili) – Polísia Nasionál Timor-Leste (PNTL) ho Komisaun Anti Korrupsaun (KAK) asina Kuarta-Feira ne’e akórdu kooperasaun servisu ne’ebe sei foku ba prevene no kombate korrupsaun iha Timor-Leste.

Komandante Jerál PNTL, Komisáriu Faustino da Costa reforsa, ho akordo ne’ebe estabelese sei fortifika kolektivu servisu parte rua liu-liu luta ba kombate korupsaun.

Faustino fundamenta, da Costa hatutan, ho akórdu ne’e fo biban ba PNTL atu apoio servisu KAK liu-liu ajuda halo investigasaun bá suspeitu sira, nune’e evita iha impedimentu ka obstrusaun bá autoridade orden públika durante prosesu investigasaun.

“Iha pontu tuir mai troka informasoene entre instituisaun rua, KAK nia servisu atividade investigasaun nian, bele husu kolaborasaun autoridade Polisiál nian iha kazu kona-ba rekuza asesu ka obstrusaun ou impedimentu bá ezersísiu asaun investigasaun nian husi parte vestináriu sira, hodi muda obstrusaun ne’e hodi garante katak, realizasaun no seguransa bá servisu Investigasaun sei la’o tuir dalan no prosesu ne’ebé iha,” dehan Komisáriu Faustino da Costa, iha diskursu, bainhira semana asinatura akórdu ho KAK iha salaun Sentru Formasaun Polísia Comoro, Dili, Tersa-feira ne’e.

Nia hatutan, nota entendimentu ne’e mós hakarak atu kria mekanízmu entre PNTL ho KAK, nune’e bele utiliza hamutuk fasilidade ne’ebé instituisaun rua ne’e.

“Parte sira hanesan PNTL tantu KAK konkorda ona atu dezenvolve, promove no hasa’e kapasitasaun kapasidade instituisaun nian liu husi hala’o atividade sira konjuntu apoiu iha área operasaun ne’ebé ita sei halo,” afirma Komandante Jerál PNTL.

Sorin seluk, Komisáriu KAK, Sérgio da Costa Hornai agradese bá Komandu PNTL, tanba bele konvida KAK hodi iha asertasaun ida hodi realiza asinatura memorandum entendimentu ida-ne’e, tanba instituisaun rua ne’e hakarak iha kooperasaun ne’ebé metin liután atu bele kombate krime iha ámbitu krime korrupsaun iha Timor-Leste.

“Bele iha krime ordináriu, maibé iha krime koneksu sira-ne’ebé iha relasaun bá iha krime organizadu sira liu-liu bá iha krime korrupsaun sira hanesan abuzu de poderes, krime pekulatu, krime partisipasaun ekonómika no mós bá iha modus operandi krime sira seluk bá iha droga no mós bá iha tráfiku umanu ninian,” dehan Komisáriu KAK, Sérgio Hornai.

Liu husi akórdu ne’e mós, atu bele iha vizaun ho asaun ida de’it atu konsolidasaun liután operasaun PNTL ho KAK nian.

Maibé, bainhira iha membru no ajente PNTL no funsionáriu estadu ruma komete iha krime korrupsaun, tenki responsabilidade kriminal, tanba kódiku penál hateten ona katak, responsabilidade la’ós atu delega fali bá ema seluk.

“Agora kestaun prátika balun ne’ebé mak halo husi ajente tantu iha PNTL, hanesan mós instituisaun públika estadu nian, iha responsabilidade kriminal ne’e rekae bá iha responsabilidade ida-idak nian. Hanesan iha ita-nia kódiku penál hateten, responsabilidade kriminal ne’e labele substitui bá ema seluk, sé nia mak nia tenki responsabiliza kriminal ida-ne’e nian,” subliña nia.

Entretantu, asinatura akórdu refere husi Komandante Jerál PNTL, Komisáriu Faustino da Costa ho Komisáriu KAK, Sérgio da Costa Hornai ne’e, partisipa husi Komisáriu KAK sira, no mós ofisiais no superiór Komandu PNTL inklui Komandante Polísia Munisípiu no Unidade sira.(ant)