KAFI Aprova Autorizasaun Konkursu Públiku Bá Projetu Portu Pasajeiru Dili ho Konstrusaun Muzeu Nasionál

Smnewstl.com 29-12-21 (Dili) — Rezultadu husi enkontru Konsellu Administrasaun Fundu Infrastrutura (KAFI) aprova no fó autorizasaun bá Ministériu Transporte Komunikasaun (MTK) atu loke konkursu públiku bá projetu konstrusaun Portu Pasajeiru Dili.

Vise-Ministru Obras Públikas (MOP), Nicolau Lino Freitas Belo informa, proposta ne’e aprezenta husi Ministru MTK, José Agostinho da Silva, enkuantu konstrusaun bá Muzeu Nasionál aprezenta husi Ministru Administrasaun Estatal (MAE), Miguel Perreira de Carvalho, tan ne’e, tinan oin MTK bele hahú loke konkursu públiku.

“Aprovasaun hotu sei loke konkursu tinan oin, ida Portu ne’e husi MTK, ida seluk mak aprovasaun kona-ba konkursu bá iha Portu Pasajeiru Dili ninian, ida seluk mak bá iha obra husi Administrasaun Estatal ninian kona-ba konstrusaun Muzeu Nasionál ninian, assuntu tolu mak ohin ita diskuti,” dehan Vise MOP, Nicolau Lino Freitas Belo hafoin remata enkontru KAFI iha Ministériu Planu Ordenamentu (MPO) Fatuhada, Dili, kuarta ne’e.

Projetu konstrusaun bá Portu Pasajeiru Dili ne’e, sei konstrui husi kompañia nasionál ho valór orsamentu dólar $ 293 mill, tan ne’e hein de’it atu selebra kontratu ho governu liu husi MTK.

“Ne’e hein bá implementasaun manán na’in iha tiha ona husi MTK, empreza manán nasionál iha ona, ne’ebé ohin aprova, semana oin ou tinan oin sira bele halo kontratu nune’e tama ona ba faze konstrusaun ho montante $ 293 mill, no sei hetan apoiu tékniku husi MOP hodi halo supervizaun.

Durante enkontru KAFI, Vise MOP, Nicolau Lino Freitas Belo mós aprezenta kona-ba kondisaun estrada ligasaun Balibó bá Bobonaru ne’ebé kotu tanba impaktu husi udan iha loron hirak liu bá no mós kondisaun estrada ne’ebé hetan estragus husi udan iha Munisípiu sira seluk.

Enkontru KAFI ne’e lidera husi Vise Primeiru-Ministru no MPO, José Maria dos Reis ne’ebé hanesan mós Prezidente KAFI, kompostu husi membru sira hanesan, Ministru Finansas, MAE, Ministru Transporte Komunikasaun (MTK), Vise MOP, ADN no seluk tan.

MOP Simu Ona Dadus Infraestrutura Ne’ebé Estragu Husi Udan Semana Kotuk

Iha parte seluk, Nicolao sublinha, simu ona dadus ne’ebé tékniku sira rekolla kona-ba infraestrutura ne’ebé hetan estragus kauza husi udan iha loron 23 fulan Dezembru 2021 semana kotuk.

Nicolao haktuir, tuir dadus ne’ebé simu mak hanesan rai monu estraga infrasturtura taka metin estrada iha suku Leolima Postu Administrativu Balibó, Munisípiu Bobonaru, Ponte Kailaku, Ponte Bilimau, inklui estrada ligasaun Natarbora bá Dilór Viqueque.

“Dadus ida-ne’ebé foin dadauk inundasaun akontese iha dia 23 Dezembru iha Balibó suku Leolima, oras dadauk, husi parte Obras Públikas atende normaliza dadauk ona estrada rai monu hodi impede movimentasaun transporte husi Dili bá Maliana.

Oras ne’e dadauk, Institutu Jestaun Ekipamentu (IJE) mobiliza ona ekipamentu pezadu hamutuk ho ekipamentu pezadu husi emprezáriu nasionál sira-nian hodi normaliza ona kondisaun estrada iha Leolima Balibó, nune’e transporte públiku bele halo movimentasaun fila-fali.

“Ida seluk ponte Kailaku iha ponte Bilimau hetan ameasa husi bee, ita orienta ekipamentu husi IJE bá normaliza ona. Alem de ne’e iha Natarbora, Dilór ninian mós ita organiza hela IJE par bele normaliza lalais,” dehan Vise MOP ne’e.

Estrada ligasaun Natarbora Dilór ne’e importante tebes, tanba ne’e transporte públiku sira bele movimentu husi Natarbora bá Viqueque, Manufahi, Ainaru to’o Suai Covalima.

Tan ne’e Governante ne’e subliña, governu finaliza ona verifikasaun no tau ona osan atu rekopera fali infraestrutura sira-ne’ebé hetan estragus husi kalamidade públika 4 Abríl foin lalais ne’e.

Tan ne’e, hahú tinan oin 2022, sei halo konkursu públiku atu hahú faze implementasaun bá projetu hirak ne’e.(ant)