Kadetes Foun F-FDTL 239 Ofiasialmente Aprezenta A’an, 3 Elemina Inklui Ida Involve Iha Grupu Artemarisiais

Smnewstl.com 22-09-2021 (Dili) – Komisaun rekrumentu elimina ona sidadaun na’in tolu husi lísta kadetes foun FALINTIL Forsa Defeza Timor-Leste nian, maske pasa ona iha prosesu teste hotu.

Iha kuarta-feira ohin, kadetes foun F-FDTL husi rejime jerál na’in 239 husi munisípiu 7 kompostu husi Dili hamutuk na’in 48, Likisá 27, Bobonaru 17, Ermera 53, Aileu 30, Manatutu 21 no Baucau 43 ne’ebé mak pasa ona iha teste, aprezenta aan iha komandu jenerál F-FDTL, hodi halo idetifikasaun molok inkorpora iha instituisaun refere.

Maibé, husi kadetes na’in 239 ne’e, sidadaun na’in tolu mak, komisaun rekrutamentu elimina, tanba sira tolu ne’e, na’in ida husi munisípiu Ermera la marka prezensa hodi aprezenta aan, na’in ida seluk husi munisípiu Dili tanba kestaun pasadu no ida seluk husi munisípiu Likisá involve iha grupu arte marsiais.

Sekretáriu Tékniku Komisaun Rekrutamentu, Kapitaun Rui Soares hateten, kandidatu ne’ebé mak la marka sei hasai kedas husi lista, tanba sei iha kadetes foun ne’ebé sei substitui.

“Iha komferénsia imprensa ami hatete, sé mak la marka prezensa ohin, nia elimina ou reprovadu, tanba ne’e, ema ne’ebé ohin la mai, sei iha substituisaun, rezerva barak, ema hakarak tama, oportunidade fó lakoi mai pasiénsia ne’e nia konsekuénsia,” dehan Kapitaun Rui Soares, iha kuartel jerenál Fatuhada, hafoin fó halo identifikasaun bá kadetes foun sira.

Kapitaun Rui Soares husu, kadetes foun ne’ebé mak selesionadu ona, atu prepara aan, nune’e dia 27 Setembru 2021 segunda-feira tuku 9 dader, konsentra ona iha kuartel jenerál F-FDTL, hodi nune’e ekipa komisaun transporta bá sentru instrusaun Metinaru.

“Bá imi ne’ebé mai, atentu didi’ak, tanba dia 27, 9 oras hotu-hotu tenki-ser mai sedu 9 oras kareta mós stand by iha ne’e transporta ita-boot sira bá Metinaru, ne’e dia ofisialmente inkorpora bá instituisaun, nestemomentu ohin ita-boot sira kadetes, loron 2, 3 ami sei fó ita-boot sira iha uma prepara ita-boot sira-nia sasán,” apela Kapitaun Rui.

Nia hatutan, komisaun rekrutamentu elimina kadetes na’in rua, tanba la hatudu onestidade iha prosesu teste kona-ba involvimentu iha grupu arte marsiais ruma, tanba forsas armadas hakribi totál aktu arte marsiais.

“Imi haree imi-nia maluk na’in rua iha li’ur ne’e, uluk kedas ami husu onestidade importante, balun mete arte marsiais mais nunka deklara aan, balun ne’ebé tama iha ne’e tanba deklara ami konsidera, imi-nia maluk iha kotuk mete arte marsiais mais nunka deklara. Onestidade importante ne’e mak forsa husu, imi atu mete arte marsiais saida-saida, tanba forsas armadas hakribi imi-nia aktu sira involve iha arte marsiais,” afirma nia.

Komisaun rekrutamentu mós husu kadetes foun sira, molok tama iha instituisaun F-FDTL mínimu tenki simu ona vasina kontra Covid-19 iha doze primeiru, maibé ida-ne’ebé seidauk vasina maka sei hasai hotu, tanba la vasina bele fó rísku bá ema seluk.

Entretantu, iha kinta-feira aban, médiku sira sei halo mós teste urin bá feto sira, nune’e, evita labele iha feto ne’ebé ho kondisaun grávida hodi tama asarama militár, tanba kuandu teste urin mak identifika grávida, maka komisaun sei elimina mós.(ant)