Juventude no Estudante Mileniál Deklara Apoiu Total Horta Ba Aitarak Laran

Smnewstl.com 26-01-2022 (Dili) — Juventude no estudante mileniál deklara, sei fó apoiu tomak bá Kandidatu Prezidente Repúblika (PR), José Ramos-Horta periódu 2022-2027.

Porta-voz Juventude no Estudante Mileniál, Vitória Soares liu husi komferénsia imprensa afirma, juventude no estudante mileniál nu’udar grupu juventude independente ne’ebé la inklina bá partidu polítiku ruma.

Tanba ne’e, reafirma sira-nia prontidaun atu fó apoiu bá kandidatu PR, José Ramos-Horta bá periódu 2022-2027 nu’udar kandidatu independente, tanba hetan mós apoiu husi Líder Karismátiku, Kay Rala Xanana Gusmão no entidade seluk iha Timor-Leste.

“Ami nota katak, kandidatu Señór Dr José Ramos-Horta iha kapasidade akumulativu hodi hakuak líder sira hotu, líder 75 (1975) líder kontinuador no jerasaun foun sira, atu nune’e hakotu impase polítika iha rai laran,” dehan Porta-voz, Vitória Soares, iha sede Kandidatura PR, José Ramos-Horta nian Aimutin, kuartu ne’e.

Juventude mileniál mós observa katak, Premiadu Nobel da Páz, José Ramos-Horta, iha pezu polítika atu bele rezolve problema interna, liu-liu atu influénsia governu hadi’a ekonomia liu husi investe bá setór produtivu sira hanesan infraestrutura, agrikultura, edukasaun, saúde no seluk tan.

Tanba, kada tinan governu no Parlamentu Nasionál aprova orsamentu ho montante boot, maibé osan sira-ne’e nunka sulin tun to’o baze.

“Kandidatu José Ramos-Horta iha kapasidade hodi rezolve problema externa, kria relasaun di’ak ho nasaun seluk iha mundu, promove ekonomia Timor-Leste iha rai li’ur no dada investor internasionál mai investe iha ita-nia nasaun,” subliña Vitória.

Juventude estudante mileniál sira-ne’e mós prefere Xefe Estadu ne’ebé iha kuiñesimentu diplomasia, tanba la kleur tan Timor-Leste mós sei adere bá organizasaun rejionál ASEAN, nune’e bele atrai investor internasionál hodi mai investe iha Timor-Leste hodi hadi’a ekonomia nasaun nian.

Tanba ne’e, Vitória Soares apela bá juventude no inan-aman sira hotu, atu lori hikas Premiadu Nobel da Páz, José Ramos-Horta, asume fali kargu nu’udar PR bá periódu 2022-2027 hamutuk ho Líder Karismátiku, Kay Rala Xanana Gusmão.

Nune’e líder nasionál na’in-rua bele dezenvolve nasaun ne’e bá futuru ne’ebé di’ak no prepara dalan ne’ebé nakonu ho esperansa bá Timoroan tomak.(ant)