Jogu ‘Bola Guling’ Lori Sidadaun Nain 4 Ba Toba Iha Sela PNTL Kaikoli

Smnewstl.com 12-10-2021 (Dili) – Maluk sira.!Kuidadu ho pratika Jogu Ilistu ‘Bola Guling’ karik la hetan lisensa husi estado.

Iha loron, 10 Outubro 2021, Polisia Nacional Timor Leste halo greve ba jogu refere iha Bairu BTN 3, Aldeia Terras Santa, Suco Madohi, Posto Administrativo Dom Aleixo, Municipio Dili, no kaptura sidadaun nain 4, hodi ba sulan iha Sela Polisia Kaikoli, molok submete ba Julgamentu Primeira Interogatorio Iha Tribunal.

Komandante Polísia Munisípiu Dili, Superintendente Xefe Polísia Henrique da Costa justifika, jogu bola guling iha Suku Madohi illegal, tanba laiha lisensa ruma husi inspetór jogu Ministériu Turízmu Komérsiu Indústria (MTKI).

“Iha dia 10 de Outubru 2021 iha tuku 10 ho balun, ekipa investigasaun kriminál munisípiu Dili halo operasaun bá iha fatin bola guling sira, konsege detektak iha suku Madohi, aldeia Terra Santa área eis BTN 3 Tasi-Tolu nune’e asegura kedas ema nain 4 lori mai iha ne’e hodi submete ba prosesu,”informa Henrique iha Komandu Polísia Munisípiu Dili, Tersa ohin.

Suspeitu 4 ne’e ho inisiál JBP, NS, FND no RDC, oras ne’e dadauk kumpre hela oras 72 iha sela detensaun Komandu Polísia Munisípiu Dili, nune’e sei aprezenta bá Ministériu Públiku hodi prosesa bá tribunal.

“Agora dadauk suspeitu na’in ha’at iha hela ita-nia sela detensaun hodi kompleta 72 oras no kompleta ita-nia prosesu lori aprezenta bá iha munisípiu públiku. Ida ho inisiál JBP, NS, FND, RDC, suspeitu sira agora dadauk iha sela detensaun polísia ninian,” dehan Henrique.

Superintendente Xefe Polísia Henrique da Costa hatutan, hafoin kaptura, suspeitu sira tenta atu fó subornu ho osan ho montante dólar $ 100 bá polísia, tanba ne’e autoridade seguransa kaptura sira lori bá detein iha sela kaikoli.

“Depois ita halo kapturasaun, suspeitu sira tenta atu suborn fó osan bá iha polísia hamutuk dólar $ 100, entaun ita-nia polísia kaptura kedas sira seluk tan lori mai hatama iha sela, no prosesu kontinuasaun investigasaun prepara hela,” haktuir Henrique.

Iha operasaun ne’e, autoridade seguransa prende mós evidénsia balun hanesan, bolga guling no mós osan ho montante dólar $ 100 ne’ebé atu fó subornu bá polísia.

Komandante Polísia Munisípiu Dili ne’e husu atu hala’o jogu bola guling, tenki hetan lisensa husi MTKI liu husi inspetór, bainhira hetan ona lisensa husi inspetór jogu, maka tenki aprezenta bá polísia, nune’e polísia labele halo intervensaun.(ant)