Smnewstl.com 14-01-2022 (Dili) — Movimentu Junta Forsa Polítika (JFP) Aliadu Defende Direitu Demokrátiku (ADDD) Xanana-Ramos (XA-RA) deklara, fó apoiu másimu Líder Naisonál, José Ramos-Horta bá Prezidente Repúblika no Kay Rala Xanana Gusmão bá Primeiru-Ministru.
Sexta-feira ne’e, eis Prezidente Repúblika, José Ramos-Horta fó ona tomada de posse bá estrutura nasionál no munisípiu JFP ADDD XA-RA nune’e hala’o servisu hodi fó susesu bá kandidatura José Ramos-Horta bá Prezidente Repúblika, no mós apoiu Kay Rala Xanana Gusmão iha Eleisaun Parlamentár.
Prezidente JFP ADDD XA-RA, Lucas Soares ‘Kolibere’ afirma, JFP ADDD XA-RA mosu atu mobiliza povu tomak nune’e fó apoiu bá Líder istóriku Xanana Gusmão ho José Ramos-Horta atuu bele korre povu husi ki’ak no mukit inklui hasai povu husi injustisa no dúvidas laran.
“Importante mak Timoroan hotu-hotu hamutuk par halo mudansa bá rai ida-ne’e, tanba povu barak iha inserteza nia laran, iha injustisa iha dúvidas iha sira-nia futuru, tanba ne’e JFP ADDD XA-RA harii no ohin toma posse hodi hetan knár hodi bele hatutan bá povu tomak hodi apoiu Prezidente Repúblika no Primeiru-Ministru,” dehan Lucas Soares ‘Kolibere’, hafoin posse iha salaun Katedral, Dili, Sesta ne’e.
Lucas Kolibere dehan, JFP ADDD XA-RA legaliza ona iha notariadu Ministériu Justisa. “Ami tau XA-RA, ida bá Aitarak-laran no ida bá Palásiu Governu, entre rua ne’e ita haree prosesu,” dehan nia.
Premiadu Nobel da Páz, José Ramos-Horta hateten, nia seidauk deklara atu kandidata bá Prezidente Repúblika, maibé sei iha novidade di’ak husi Líder Karismátiku, Kay Rala Xanana Gusmão iha loron hirak tuir mai ne’e.
“Ha’u lakoi ko’alia barak, tanba ohin la’ós abertura kampaña ruma, ha’u seidauk kandidatu, ema barak hanoin ha’u kandidatu aan, ha’u seidauk, ohin ga aban bele iha novidade ruma mai husi Maun Boot Xanana bá oin mak ita servisu makas liután para ita to’o 20 de Marsu povu matenek hili sé,” dehan José Ramos-Horta.
Horta husu bá kandidatu PR sira seluk, tenki didi’ak dezafiu sira-ne’ebé durante ne’e Timor-Leste hasoru, nune’e bainhira eleitu bele rezolve.
“Ha’u espera kandidatu hotu-hotu tau naran tiha ona ko’alia tiha ona, hanoin bá dezafiu sira-ne’e, momentu nia eleitu, nia tenki bok aan par rezolve, la’ós rezolve ho runggu-rangga ho radikalizmu ho estrimizmu depois distabiliza situasuan,” dehan nia.
Timor-Leste hasoru dezafiu barak tebes, tan ne’e, ejize serenidade líder sira-nian atu halo análize kle’an bá situasuan hotu, atu bele fó solusaun bá dezafiu sira-ne’e.
Sorin seluk, Líder Nasionál, Rogério Tiago Lobato hateten, Timor-Leste tenki muda maka tenki hamutuk ho Líder Karismátiku, Kay Rala Xanana Gusmão ho José Ramos-Horta.
“Ha’u hakarak hatene de’it katak, Timor tenki muda, ami sira-ne’ebé hamutuk ho Maun Ramos-Horta, Maun Xanana sira mak la hamutuk ho ita mate hotu bá rai ida-ne’e, maske sira mate hotu ona, maibé sira-nia espíritu hamutuk ho ita hodi muda rai ida-ne’e,” dehan Rogério Tiago Lobato.
Tanba tuir Rogério Lobato katak, povu labele moris ho esperansa de’it, tanba povu moris ho esperansa durante tinan 24 atu ukun aan, maibé povu kontinua terus nafatin.
“Ne’eduni ita labele husu beibeik de’it povu dehan, pasiensia la’e. To’o ona, balun mak pasiensia to’o mate tan la hetan benefísiu husi independénsia loloos iha sira-nia moris,” dehan nia.
Partisipa iha serimónia tomada de posse ne’e mak, Líder Istóriku, Rogério Lobato, José Ramos-Horta, Madre Guilhermina no mós membru JFP ADDD XA-RA sira hotu.(ant)
Komentariu