Jestaun Merkadu ho Polísia Sei ‘Buska’ Transporte ho Vendedor Okupa Trotoar Leten

Smnewstl.com 28-11-2021 (Dili) – Prezidente Autoridade Munisípiu (PAM) Dili, Guilhermina Filomena Saldanha Ribeiro deklara, tempu badak jestaun merkadu munisípiu Dili, sei servisu hamutuk ho Polísia Nasionál Timor-Leste (PNTL) atu operasaun bá kareta inklui vendedór sira-ne’ebé kontinua para no fa’an sasán iha trotora leten.

Guilhermina afirma, liu husi operasaun konjunta ne’e, bainhira identifika kareta no motor inklui vendedór sira kontinua fa’an sasán sira para iha trotoar leten, sei foti medidas hasoru sira, tanba trotoar ne’e fatin bá ema la’o ain sira, la’ós atu para kareta no fa’an sasán iha leten.

“Ha’u hakarak asegura katak, apartir bá oin, ami-nia ekipa jestaun merkadu sei halo asaun bá situasaun ida-ne’e, ami sei servisu hamutuk ho Polísia ekipa orden públika atu bele haree kareta sira para iha trotoar ho ita-nia vendedores sira-ne’ebé fa’an iha trotoar ne’e,” dehan Prezidente Autoridade Munisípiu Dili, Guilhermina Ribeiro, iha knar fatin Adminitrasaun Munisípiu Dili, Domingu ne’e.

Kareta ne’ebé kontinua para iha trotoar ne’e, Prezidente Autoridade Munisípiu Dili ne’e konsidera, motorísta sira mak laiha konsiénsia, tanba sira hatene ona katak, fatin ne’e bá ema la’o ain sira.

Maibé, nia rekuiñese, atu muda ema ida nia konsiénsia la fásil, maibé, mós sei la nonok, no kontinua konsiensializa nafatin sidadaun atu bele komprende kona-ba utilizasaun trotoar nian ne’e.

“Ita atu hadi’a konsiénsia ne’e difísil, maibé, ha’u mós lakoi dehan katak, susar, presiza ko’alia beibeik hamutuk ho Polísia atu oins’a tau regras bá situasaun ida-ne’e, presiza asaun ida mak konsiénsia ema ida nian, nia tenki hatene katak, trotoar ne’e la’ós fatin atu para kareta, la’ós fatin atu ema fa’an sasán,” dehan nia.

Guilhermina afirma, hahú iha dia 1 Dezembru fulan oin, jestaun merkadu munisípiu Dili, sei halo operasaun iha kapitál Dili, tanba kada tinan iha fulan Dezembru ne’e, sidadaun sira sempre fa’an ropa iha trotoar leten.(ant)