Japaun Apoia Adezaun Timor-Leste ba ASEA

Smnewstl.com – Japaun apoia adezaun Timor-Leste ba ASEAN no Tokyo promte estabelse kooperasaun iha área oi-oin.

Apoiu Japaun ne’e expressa, waihira Primeiru-Ministru, Kay Rala Xanana Gusmão hamutuk ho xefe estadu no Xefe Governu ASEAN partisipa iha simeira Asosiasaun Nasoens Sudeste Aziatiku (ASEAN- Japaun) ba dala-50 iha Tokyo Japaun.

Xefe Governu Japaun agradese tebes partisipasaun Timor-Leste iha simeira ASEAN- Japaun atu hametin visaun no relasaun “Heart to Heart (Husi Fuan ba Fuan) entre ASEAN – Japaun hodi hamosu deklarasaun konjunta.

Japaun nu’udar parseiru estrateziku ba dezenvolvimentu ASEAN, kontinua apoia área importante hotu- hotu hodi lori nasaun Timor-Leste sai nu’udar membru plenu permanente ba organizasaun rejionál ne’e liu-hosi rekursu humanu.

“Benvindo Primeiru-Ministru Xanana mai iha simeira ASEAN-Japaun ba 50, agradese tebes ba ita nia partisiapasaun bele hametin liután ita nia lasu amizade no Japaun sei apoia Timor-Leste sai membru ASEAN,” informa PM Japaun Fumio Kishida
Ba Timor Leste, estatutu obserbador iha ASEAN ne’ebé geografikamente tama Rejiaun Sudeste Aziátik presiza kria no haluan ninia estratezika kooperasaun bilaterál, multi-laterál, tri-lateral ho pais membru ASEAN.

Primeiru-Ministru Xanana agradese ba Primeiru-Ministru Japaun, Fumio Kishida ba ninia apoia tomak ba Timor-Leste ninia prosesu kontrusaun estadu no apoia infraestrutura hodi dezenvolve Timor-Leste no apoia Timor-Leste sai membru ASEAN iha tinan 2025.

“Primeiru lugar ha’u hato’o agradese konvite mai partisipa iha Simeira ASEAN-Japaun ba dala-50. Alende ida ne’e, oportunidade ida hametin kooperasaun entre nasaun rua no nasaun ASEAN sira,” PM Xanana agradese.

Xanana Gusmão informa katak, simeira ASEAN-Japaun ne’e oferese oportunidade ba Timor-Leste hodi truka hanoin, aprende lisaun matenek hosi ASEAN ba ninia apoiu forte adezaun Timor-Leste nian ba ASEAN no ninia empeñu atu ajuda Timor-Leste hodi implementa roteiru ba adezaun hanesan membru plenu direitu ASEAN nian.

“Japaun primeira nasaun ne’ebé dezde 2000 ajuda Timor-leste liu hosi JICA apoia ami prosesu kontrusaun estadu, no ami apresia tebes ba apoia ne’e,” tenik PM.

Durante enkontru, Xefe Governu rua, akompaña hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay,Vise-Ministra ba Asuntus ASEAN, Milena Maria da Costa Rangel no Embaixador Japaun ba Timor-Leste, Ilidio da Costa Ximenes ho ekipa la’o ho ambiente amizade tebes.

Vizita ne’e termimina ho serimónia entrega prendas ba malu entre Xefe Governu rua hodi hametin liután kooperasaun mutual entre rai ruan ne’ebé la’o dadaun. (Smnews)