IOM Falisita Ekipamentu Verifikasaun Dokumentu Falsu Tolu Bá Governo

Smnewstl.com 25-10-2021 (Dili) – Organizasaun Internasionál bá Migrasaun (IOM) iha Timor-Leste entrega ekipamentu verifikasaun Verifier Travel Document and Bearer (TD&B), tolu bá governo liu husi Ministériu Interiór (MI) hodi fasilita Servisu Migrasaun (SM) atu verifika dokumentu falsu ka fraude sira iha pontu entrada.

Vise-Ministru Interiór, António Armindo hateten, desde inísiu tinan 2021, IOM manifesta sira-nia prontidaun atu apoiu Servisu Migrasaun, nune’e bele halo servisu di’ak liután iha fronteira hodi verifika dokumentu falsu sira iha liña fronteira, Portu no Aeroportu.

“Ministériu Interiór liu-liu Servisu Migrasaun hetan apoiu husi IOM ko’alia desde inísiu tinan ne’e katak, sira hakarak ajuda ita ho ekipamentu verifier, verifier hanesan ekipamentu sekundáriu ida-ne’ebé mak ajuda Migrasaun par halo verifikasaun bá iha dokumentu falsu fraude sira-ne’e iha liña fronteira sira, liu-liu pontu entrada sira Aeroportu, Motaain ho Sakato,” informa Vise MI, António Armindo, hafoin simu ekipamentu husi IOM iha salaun Novu Turízmu, Dili, segunda ne’e.

António Armindo afirma, tuir planu, iha inísiu fulan Novembru, IOM hahú instala ona ekipamentu Verifier Travel Document and Bearer iha pontu entrada.

Foin instala IOM sei fó treinamentu bá membru Polísia Servisu Migrasaun sira, nune’e bele opera ekipamentu refere, tanba ekipamentu ne’e foun, ne’ebé iha ligasaun mós ho sistema INTERPOL nian.

“Dezafiu ida mak ekipamentu ne’e foun presiza treinamentu, ita-nia parseiru IOM prontu ona par atu halo treinamentu bá sira, par halo oinsá sira bele familiariza ho ekipamentu ne’ebé sira fornese, ekipamentu ne’e mós liga ho sistema INTERPOL, atu nune’e identifika iha fraude ruma sistema ne’e bele deteta kedas. Tuir ida-ne’ebé mak konkorda katak, pontu sira-ne’e tantu fronteira terrestre ho Aeroportu,” tenik Vise MI.

Fatin hanesan, Xefe Missaun IOM iha Timor-Leste, Aishath Ihma Shareef hateten, ekipamentu ne’e IOM sosa ho orsamentu IOM nian rasik atu apoiu Servisu Migrasaun nian iha pontu entrada sira.

“Projetu ne’e fundus husi IOM nian rasik IOM development found, nia objetivu mak atu kombate tráfiku iha fronteira. IOM sei instala mákina ne’e iha fronteira tolu, no mós sei treinamentu bá PNTL sira oinsá atu uza sistema ida-ne’e,” dehan Xefe Missaun IOM iha Timor-Leste, Aishath Ihma.

Alem de ne’e, Diretór Jerál Servisu Migrasaun, Superintendente Asistente Polísia Luís Barreto hatete, sistema Verifier Travel Document and Bearer importante tebes bá Servisu Migrasaun, nune’e Migrasaun bele deteta dokumentu falsu ne’ebé sidadaun estrajeiru sira tama iha Timor-Leste.

“Ida-ne’e importante duni, tanba agora mundu ne’e globalizasaun, movimentu iha mundu ne’e agora lívre, ho ekipamentu sira-ne’e par bele ajuda Migrasaun par hodi deteta dokumentu sira-ne’ebé mak estranjeiru sira balun mai, balun falsu,” dehan Luís.

Durante ne’e, Servisu Migrasaun uza sistema anteriór TASE hodi deteta dokumentu falsu sira iha fronteira, maibé ekipamentu refere difente ho ekipamentu foun ne’e.

“Durante ne’e ami iha sistema ida bolu dehan, TASE, maibé nia monta iha sistema laran la hanesan ho ida agora, ida agora ami haree kompletu avansadu oituan, ami simu depois ami hala’o liu husi treinamentu depois establese iha fronteira,” haktuir nia.

Superintendente Asistente Polísia Luís Barreto afirma, Migrasaun sei prepara ofisiál na’in 20 to’o 25 atu partisipa iha treinamentu ne’e, nune’e sira bele iha koñesimentu hodi opera mákina sira-ne’e.(ant)