Intrega Uma Dignu ba Familia Manuel Soares, Horta Agradese UPF ho Mama Bolu

Smnewstl.com 17-02-2022 (Batugade) — Premiadu Nobel da Paz, José Ramos Horta akompaña hosi Komandante Unidade Polísia Fronteira (UPF), Superintendente, Euclides Belo ohin entrega tan uma dignu ida ba família Manuel Soares ho nia espoza Berta Verdial iha sira-nia hela fatin fronteira Aldeia Tolan TCL 23, Suku Batugade, Postu Administrativu Balibo, Munisipiu Bobonaru.

Prosesu kontrusaun uma ne’e hetan apoiu materiál hosi Premiadu Nobel da Paz, José Ramos Horta no ekipa MAMA BOLU no emprezariu Timoroan balun no servisu kontrusaun halo direita hosi ekipa membru UPF ho Komandante Polisia Militar (PM), Postu Mota-Ain, Primeiru Sarjentu “Lekiluru” no ekipa tékniku forsa rua.

Premiadu Nobel da Paz, Ramos Horta hato’o agradese ba ekipa UPF, Polisia Militár F-FDTL, Ekipa MAMA BOLU ne’ebé hatudu sira nia domin no solidaridade hodi harii hikas uma ba familia ne’e.

“Ha’u agradese ba Komandu UPF senhor Komandante Euclides Belo ho sira nia meius hodi halo uma ne’e, ha’u kontente tebes haree uma ne’e bele fasilita ona familia tiu Manuel ho familia pelumenus hela ho di’ak,” dehan dehan Eis PR, José Ramos-Horta, hafoin entre uma bá benefisiáriu sira iha iha Badut Merah Mota-ain, Munisípiu Bobonaru, kinta ne’e.

Horta dehan, apoiu ne’e labele haree ba nia valór, importante liu maka Timoroan sira hatudu sira nia domin no solidaridade tenki sai kultura ba Timoroan sira hodi tau hamutuk apoiu ajuda ba hirak ne’ebé presiza tebes.

“Apoiu ne’e ita hatudu ita nia domin, labele haree ba nia valór, tanba ajuda ne’e mai ho ita nia domin, no ha’u espera apoiu ne’e sei kontinua nafatin, hanesan apoiu ne’ebé Maun Boot Xanana halo ho Timoroan sira durante ne’e,” tenik nia.

Ho hamnasa no kontente parante iha membru UPF tomak nia oin, Horta afirma bainhira povu hili nia eleitu sai sai prezidente republika periodu 2022-2027, nia prontu koopera ho UPF, Mama Bolu no Polisia Militár kontinua programa ajuda povu kbiit laek iha aspeitu oin-oin.

Fatin hanesan, Komandante UPF Euclides Belo dehan, antes ne’e nia halo obserbasaun direita haree familia Manuel Soares ho nia kaben no oan mane ida ne’ebé sofre moras difiensia mentál no fíziku hela de’it iha uma duut ida ne’ebé sira kontrui, maibé uma refere ninia kakuluk no airin sira komesa aat no lahuk hotu ona, no nia parte buka kedas apoiu hosi parte hotu hodi ajuda too prosesu kontrusaun remata.

Komandante UPF Euclides hato’o agradese ba ekipa hotu nia apoiu, liu -liu Premiadu Bobel da Paz, José Ramos Horta bele ajuda fó apoiu hodi hari uma ne’e atu dignifika komunidade vulneravel sira iha aspetu seguransa sosiál.

“Agradese hosi prosesu inísiu to’o mai agora uma ne’e halo hetan apoiu hosi ita nia Avó José Ramos Horta, ekipa MAMA BOLU no emprezáriu balun ita halo ho nia intensaun atu fasilita de’it komunidade sira ne’ebé merese duni hetan tulun, hanesan timor-oan ami iha responsabilidade morál atu ajuda malu,” hatutan nia.

Maske apoiu ne’e kiik maibé UPF ho Polísia Militár kontinua servisu hamutuk presta servisu báziku bá komunidade sira no garante seguransa bá sidadaun sira atu aproveita hodi dezenvolve moris no envolve sira-nia aan bá dezenvolvimentu nasionál.

Manuel Soares akompaña hosi nia espoza Berta Verdial ho matawen hato’o agradese ba apoiu konstrui uma too remata, inklui apoiu fasilidade hanesan, kadeira meza, toba fatin no sasán nesidade baziku seluk tan.

“Ha’u moris mai too forma familia ate agora buat ida la iha, ha’u mós selu labele ba apoiu hirak ne’e, maibé ha’u sei hasa’e de’it orasaun ba Na’I Maromak atu tulun imi hotu nia apoiu,” dehan benefisiáriu, Manuel Soares, hafoin simu uma husi Eis PR, José Ramos-Horta ho Komandante UPF, Superintendente Euclides Belo.

Komandu UPF rasik durante ne’e obserba populasaun sira iha área fronteira hetan difikuldade tebes hodi asesu ba bee moos durante tinan barak nia laran. Situasaun real ne’e sempre obriga komunidade sira, liu-liu feto no labarik sira tenke la’o kuaze metru atus ba atus hodi ba buka bee liu-husi foho ne’ebé ho temperatura manas tebes.

Uma ne’e ho kuarta rua, salah han fatin ida, no sala bainaka ida ne’ebé uza materiál simples uza piku no kalen ne’ebé kompleta ho fasilidade toba fatin hanesan kama, espoja no manta no sumasu. Dadaun ne’e eletrisidade seidauk tama, tanba área refere kategoria izoladu no dook hosi postu Balibo.

Antes ne’e, Ramos Horta no Emprezariu Timoroan, Key Xavier hamutuk ho autoridade selebra loron valentine day hodi oferta mós prezente uma furak ida ba Inan Feton Kbiit Laek, Joana Camoes “Bisoi” iha Aldeia Sisurai, Suku Betano, Postu Same-Vila, Munisipiu Manufahi.(ant)