Intelektual Foinsa’e 21 Liderado Noe Ximenes Deside Apoio Xanana Gusmao

Smnewstl.com Media Online – Partido Congreso Nacional Reconstrucao Timor-CNRT liderado Xanana Gusmao kontinua konsolida a’an hasoru festa demokrasia iha tinan 2022 no 2023.

Liu husi estrutura ekipa mobilizasaun masa Organizasaun Juventude Partido-CNRT halibur tan intelektual foinsae 21, ne’ebe voluntariamente deklara hakarak servisu hamutuk hodi fo susesu ba CNRT iha festa demokrasia (eleisaun Presidensial 2022 no Paamentar 2023).

Iha SEDE CNRT, Bairos Gerilos Dili asite husi Vice Presidente Virgilio Smith no Prezidente Konsellu Diretiva Nasionál (CDN), Porta Voz Noe Bernardino Ximenes deklara, sei servisu makas hodi fo susesu tomak ba CNRT tamba konsiderado hanesan partido alternativa ba solusaun situasaun inserteza politika rai laran.

“Ami nia prezensa laos atu hadau servisu ne’ebe anteriormente iha tia ona husi estrutura no juventude CNRT, maibe ami presiza mapamentu politika ida katak, fatin ne’ebe maka CNRT seidauk instala ninia baze, ida ne’e maka ami sei to’o,”promete Noe

Intelektual foinsae ne’e fundamenta, atu atinze objetivu laos ho deklarasaun ka argumentu iha fatin deit, maibe sei kordena oinsa bele to’o rasik iha tereinu hodi habelar politika Kay Rala Xanana Gusmao nian nune’e bele konkista rezultado tamba susesu hotu mai husi servisu hamutuk.

“Ami mai laos deit atu simu tomada de posse hotu ona, maibe mai atu organiza no servisu hamutuk oinsa bele lori vitoria ba CNRT iha Eleisaun Presidensial no Parlamentar,”nia hatutan

Vice Presidente Partido CNRT, Virgilio Smith hato’o bemvido ba foinsae sira ne’e no konsidera hanesan pasu importante ida oinsa servisu hamutuk hodi hetan susesu iha tinan 2022 no 2023.

Nune’e mos Presidente Conselho Diretiva Nacional, Dionisio Babo Soares konsidera, partido politiku ida atu sai bo’ot kuando loke a’an no buka halibur malu. Tamba CNRT liderado Xanana Gusmao sempre buka hodi halibur-malu ho foin-sae no intelectual sira nune’e troka hanoin sobre kestoens desenvolvimento nacional no lalaok moris nasaun nian ba futuru.

Antes ne’e mos iha Manleuana Dili, foinsae lubuk ida maka reafirma ona pozisaun hodi fo apoio ba Kay Rala Xanana Gusmao nune’e fila ba ukun hodi hadia rai ne’e. (Rio)