Smnewstl.com (Mosambike) – Ministru Negósius Estranjeirus no Kooperasaun (MNEK), Bendito dos Santos Freitas hateten, instalasaun Sentral Termoelétrika Empreza Públika (CTM.e.p-sígla Portugés) Mosambike nian modernu ho kualidade di’ak no tanba ne’e bele sai referénsia ba Timor-Leste. Vizita ne’e simu direta husi Prezidente Konsellu Administrasaun Eletrisidade Mosambike Empreza Públika, Marcelino Gildo ho funsionáriu sira.
Ministru Bendito Freitas hato’o assuntus ne’e, hafoin reprezenta Prezidente Repúblika, José Ramos-Horta hala’o vizita ba iha instalasaun enerjétika CTM nian iha Maputo, iha okaziaun ofisiál Xefe Estadu nian iha nasaun refere.
“Prezidente delega ha’u ba vizita instalasaun Sentral Termoelétrika Maputo, instalasaun ida-ne’ebé modernu teb-tebes ba enerjia elétrika bele sai hanesan referénsia ida atu ita-nia ekipa téknika sira bele halo estudu komparativus hodi haree katak, komponente enerjia ne’e, alende ita-nia komponente ekonómiku hanesan agrikultura no mós dezenvolvimentu ekonómiku sira seluk, enerjia ne’e impotante teb-tebes ba dezenvolvimentu povu nia moris,” hatete Ministru Bendito.
Projetu konstrusaun ba instalasaun enerjétika CTM.e.p ho valor orsamentu dollar amerikanu $ 167 milloens, husi kooperasaun entre Governu Mosambike ho overnu Japaun liu husi JICA, no inaugura iha tinan 2018, iha ne’ebé fornese ona liña eletrisidade iha kapital Maputo no mós parte sul Áfrika Austral nian ho MW 106.
Tanba ne’e, Governante ne’e dehan, ba futuru, Governu Timor-Leste ho Mosambike presiza esplora kooperasaun iha setór enerjia nian, atu bele fasilita di’ak liután ekipa téknika husi Timor hodi vizita ba instalasaun sentru termoelétrika Maputo.
“Iha diskusaun ho Prezidente Konsellu Administrasaun ho ekipa téknika, ita diskute área ida-ne’ebé importante teb-tebes ba TimorLeste bele esplora kooperasaun bilateral, nia tama iha kontestu kuádru kooperasaun CPLP nian, alende mobilidade ba ema nian, ita mós konsidera hanesan sustentabilidade enerjia nian parte ida-ne’ebé bele hamosu kooperasaun entre Timor-Leste ho Mosambike,” tenik nia.
Entretantu, vizita Ministru Bendito Freitas ba instalasaun Sentral Termoelétrika ne’e, akompañadu husi Diretór-Jerál Bilateral ba Assuntu, Áfrika Europa, Amérika no Médiu Oriente, Francisco Dionísio Fernandes ‘Mau-kura’, Primeira Sekretáriu Embaixada Timor-Leste ba Mosambike, Lenilde Pereira no seluk tan. (*/Smnews)
Komentariu