Insendiu Karantina Tasi Tolu, Xanana Asegura Labarik No Inan Isin Rua Muda Ba Fatin

Smnewstl.com-DILI, 24 FEVEREIRU- Lider Istóriku, Kay Rala Xanana Gusmão hamutuk ho ekipa lori apoiu aihan baziku ba vitima insendiu Karantina Terra Santa, Tasi Tolu Dili.

Apoiu ne’ebé ekipa Xanana oferese maka hanesan, fos karon 53, supermie 53, mina 53 inlui fugaun, sanan kiik, bikan masa, ember, kopu masa, karina etu nian no ropa ba labarik kiik sira.

Insendiu ne’ebé kauza hosi serkuitu eletrisidade ne’ebé akontese loron kinta-feira (24/02/23) oras kuaze 3:00 madrugada ne’e rezulta uma no sasan hosi xefe familia 50 ho totál abitante na’in 235 la konsege salva.

Iha vizita ne’e, Xanana ho ekipa simu hosi familia vitima inklui labarik kiik hodi halikar ‘Viva-Viva Avó Nana” kontinua kumprimente hodi informa kronoligia insendiu ne’e.

Durante vizita Xanana obserba direita armazein karreta para fatin Bombeiros nian iha Komoro ladun seguru ba vitima sira liu-liu inan isin rua no labarik sira hela no toba ba ladun seguru, nune’e ho ekipa buka kedas fatin balun iha kapital ne’ebé identifika seguru hodi muda sira provizoriu ba hela too buka solusaun ba sira nia hela fatin.

“Ha’u haree ona inan isin rua no labarik sira toba fatin ladun di’ak, ita bele lori apoia aihan no ropa mai, maibé sira nia fatin toba ladun di’ak liu-liu ba labarik no inan isin rua no avo feto no avo mane sira tenki haree fatin di’ak ruma muda imi provizoriu ba ne’ebá too imi nia fatin hadia fali,” dehan Xanana.

Iha fatin hanesan, Xefe Suku Madohi, Bernardio de Cristo Ferreira no Xefe Aldeia Terra Santa Tasi Tolu, Esperança de Jesus hamutuk ho vitima sira sente kontente, tanba bele apoia vitima sira inklui buka fatin seguru labarik no inan isin rua sira.

“Obrigado ba avo nia vizita, agora fatin provizoriu maka ne’e, maibé ita rasik haree katak, toba fatin ladun seguru, ami prontu koopera para ita muda sira fatin di’ak ruma too hadia sira nia kondisaun hela fatin foin bele fila,” dehan Xefe Aldeia Esperança.

Hafoin buka fatin balun iha sidade Dili, tuir planu, sabadu (23/02/23), Xanana hamutuk ho ekipa Bombeiros sei muda vitima sira fatin ne’ebé ekipa identifa.(remata)