Impede Servisu PNTL, Tribunál Aplika TIR bá Membru PSIK

Smnewstl.com 06-10-2021 (Dili) – Tribunál Distritál Dili (TDD) liu husi desizaun finál bá kazu obstrusaun orden públiku, aplika medidas koasaun Termu Identidade Rezidénsia (TIR) bá arguidu ho inisiál ATDCS ne’ebé hanesan membru Polísia Sientífika Investigasaun Kriminál (PSIK), tanba halo intervensaun bá servisu autoridade seguransa nian.

Arguidu ATDCS ekipa konjunta kaptura iha domingu kalan mais ou menus tuku 11:33, iha aldeia 5 de Setembru suku Comoro postu administrativu Dom Aleixo Munisípiu Dili.

Ekipa konjunta ka’er arguidu, tanba halo intervensaun bá servisu polísia nian, bainhira ekipa konjunta atu bá halo greve bá atividade bola gulin iha mate uma ida iha aldeia 4 de Setembru suku Comoro postu administrativu Dom Aleixo Munisípiu Dili ne’e.

Advogada Adelina Neluk de Jesus Lobo hateten, ministériu públiku imputa krime obstrusaun bá autoridade públiku, maibé tribunál aplika medidas koasaun TIR bá nia kliente, tanba tribunál sente katak, medida refere mak adekuadu liu.

“Obstrusaun bá autoridade públiku, TIR hanesan atu identifika ema ne’e hela iha ne’ebé, bainhira prosesu notifika karik, notifika tuir nia identifikasaun, tanba tribunál sente katak, ida-ne’e mak medida koasaun ne’ebé adekuadu liu atu asegura prosesu investigasaun, agora ita seidauk ko’alia kona-ba provadu ou la’e, ne’e prosesu ketak ida, iha investigasaun tan mak foin Detekta katak, nia akuzasaun ne’e hanusa,” dehan Advogada Privada, Adelina Neluk de Jesus hafoin remata julgamentu iha TDD, kinta ohin.

Defeza ne’e afirma, tribunál seidauk konsidera, nia kliente hanesan membru PSIK, tanba ne’e nia kliente sei koopera ho prosesu investigasaun tomak inklui la halo perturbasaun ruma.

“Seidauk garantia katak, nia hanesan membru PSIK, nia sei la perturba prosesu investigasaun, nia sei halo kooperasaun ne’ebé di’ak, sei la hamosu trankuilidade bá públiku, entaun medida koasaun ne’ebé tribunál aplika mak TIR,” dehan nia.

Julgamentu ne’e, prezide husi juíz turnu, António Goncalves, Rogerio Viegas, Ministériu Públiku reprezenta husi Prokuradór, Fernando Rangel, no arguidu ATDCS hetan asisténsia legál husi Advogada Privada, Adelina Neluk de Jesus.

Entretantu, tuir observasaun jornalista smnewstl.com iha TDD nota katak, iha áreadores TDD nakonu ho membru Polísia Nasionál Timor-Leste (PNTL), ho membru PSIK, inklui mós família husi arguidu.(ant)