Iha Liquica Horseik, ZMF Oho Fe’en no Hakanek Oan Feto 2 Hafoin Rasta ba Soe Iha Dalan

Smnewstl.com 26-12-2021 (Liquica) – Selebrasaun festa natal tinan 2021 iha Municipio Liquica li-liu Suco Leotela Fauilara, Posto Administrativo Maubara, Municipio Liquica hafalun ho ran bainhira suspeitu ida ho inisial ZMF oho fali nia kaben no hakanek oan feto rua ne’ebe nain ida ho idade 3 no ida seluk tinan 4.

Foto Inan Feton ho oan nain ne’ebe hetan husi laen iha Liquica. Foto Media Social/Facebook 

Komandante PNTL Municipio Liquica, Superintendete Polisia Umbelina dos Santos Soares  informa, kazu ne’e akontese horseik Sabado, (25-12-2021) oras tuku 5 lokoraik. Tuir informasaun ne’ebe nia hetan, ZMF oho mate tia nia kaben hafoin hakanek tan oan feto nain rua ho identidade mak hanesan Jedonia (4) no Dircia (3).

Nia hatutan, Jedonia ho Dircia konsege salva sira nia vida liu husi primeiro sikoru husi parte komunidade ho PNTL, enkuanto inan mak la konsege salva. “Kikoan nain 2 ne’e, horseik evakua kedas ba Hospital Nacional Guido Valdares nune’e liu ona husi faze kritiku no konsege salva, agora sira nain ruan diak oituan, enkuanto sira nia inan ne’ebe seidauk hatene identidade maka labele salva,”tenik Komandante PNTL feto ne’e.

Kona ba motivu, Komandante PNTL feto potensial ne’e sublinha, sei iha hela prosesu investigasaun nune’e seidauk bele hatene klaru. “Ninia motivu ne’e sei iha hela prosesu investigasaun, depois maka sei fo sai,”dehan nia.

Superintendente Polisia feto ne’e rekuinese, suspeitu ZMF dadaun ne’e asegurado ona desde kedas horseik hodi submete ba prosesu investigasaun hafoin kontinua ba julgamentu primeiro interogatorio iha Tribunal.

Ba kazu ne’e rasik, parte familia sente triste tebes tamba iha selebrasaun festa natal ne’ebe ema hotu kontenti mosu los kazu ne’ebe ema sira hotu la espera. Tuir reasaun familia, ne’ebe SMNews asesu liu husi media social ho identidade Ramon konfirma, selebrasaun natal tinan ne’e ba ba sira sente ho hahalok ZMF nian. Sira ejize atu hetan justisa ba kazu ne’e. (rio)