Iha Fatima Portugal, Xanana Reza no Hamulak Matak Malirin ba Povu no Nasaun

Smnewstl.com 07-02-2022 (Lisboa) – Lider Nacional, Kay Rala Xanana Gusmao atual Xefe Negosiador Prinsipal Delimitasaun Fronteira Maritima ne’ebe dadaun ne’e halao hela iha viagem servisu iha Losboa-Portugal, la husik le’et biban hanesan srani iha loron Domingo ba hasae orasaun iha Sanutario Nossa Senhora Fatima Portugal.

Tuir informasaun ne’ebe Smnews asesu komfirma, maske okupadu ho servisu no reuniaun sira kona ba soberania no interese nasional, maibe nafatin preokupa ho povu no nasaun. 

“Maun Boot Kay Rala Xanana Gusmão Chefe Negociador Principal, maske ocupado ho serviço no reunião sira kona ba soberania no interese nacional RDTL, maibe iha loron Domingo, 6 de Febrerio de 2022, nafatin vizita Nossa Sehora de Fatima Portugal,”informa Xefe Ekipa Teknika ba Negosiasoins, Embaixador Roberto Soares ba Smnews via mensagem.

Nia hatutan, vizita ba Sanutario Fatima hodi hamulak no hasae orasaun ba maromak liu husi interesaun atu haraik nafatin rahun kmanek, ne’ebe nakonu matak malirin iha prosesu konstrusaun no konsolidasaun nasaun no rai lulik Timor Leste.      

“Iha Nosa Senhora Fatima, Maun Boot Kay Rala Xanana Gusmao hamulak no hasae oração ba Nai Maromak liu hosi interecesão Nossa Senhora de Fatima atu haraik nafatin Rahun Kmanek, ho Força no Kbiit Espírito Santo nian, Moris ho Domin no Hakmatek, Paz no Estabilidade, Nakonu ho Matak Malirin nian ba Timor oan tomak iha processo Konstrsaun no Konsolidasaun ba nasaun no rai lulik Timor-Leste,”tenik Roberto.

Nia hatutan, durante iha Portugal aliende koalia kona ba soberania nasaun, sei atende mos enkontru balun ligado ho servisu g7+, hafoin fila hikas mai rai doben Timor Leste. (rio)