Iha Bebonuk Joven Ida Mate ho Kondisaun Tudik Latan Hela Iha Kabun Leten

Smnewstl.com 08-02-2022 (Dili) – Kalan ne’e, maizumenus tuku sanulu ho balun hetan joven ida mate ho kondisaun tudik latan hela iha kabun leten. Kazu ne’e akontese iha area iha kampung Tuti Suco Bebounuk besik kedas iha Kapela kotuk.

Parte Polisia Nasional Timor Leste ho ekipa forensik iha ona tereinu hodi asegura lokal de krime inklui transporta mate isin ba Mortuario Hospital Nacional Guido Valadares Dili hodi kontinua submete ba prosesu investigasaun nune’e bele identifika ninia kauza.

Enkuanto, tuir informasaun ne’ebe Smnews asesu komfirma, mate isin identifikado ho naran kumpletu Levi Gomes. Mate isin hetan iha fahi luhan ho kondisaun laiha ona i’is no tudik latan hela iha kabun leten, ne’ebe diskumfia sona a’an.

Tuir kronologia husi matebean nia kaben ne’ebe Smnews konsege asesu komfirma, iha oras tuku walu kalan ne’e matebean sei han hamutuk hela ho familia sira. Derepenti deit matebean hamrik no lao sai ba liur, kuaze to’o minutu 30 resin la mosu, entaun sira sai ba buka tuir iha kios ne’ebe besik. Komu la hetan, entaun familia sira fila deit.

Sente ladiak, liu tia oras ida resin familia sira kontinua buka tuir fali ho lampra no leno ba mai hetan fali iha fahi luhan laran ho kondisaun tudik latan iha kabun leten no sona iha kakorok ne’ebe diskumfia sona a’an. Matebean la konsege salva tamba ra’an sai barak husi kakorok.

Polisia Nacional Timor Leste ho ekipa forensik ne’ebe to’o iha tereinu kontinua rekolha hela informasaun hodi identifika ninia kauza. Enkuanto mate isin sei submete ba autopsia iha Mortuario HNGV. Ba kazu ne’e rasik, parte Komando Municipio Dili liderado Henrique da Costa seidauk aprezenta pozisaun.(Ant)