Husu PCIC Investiga Autor ‘Lekar’ Segredu Justisa, Xanana : ‘Hau ka Barbara Mak Publika Relatorio Ne’e’

Smnewstl.com 28-12-2021 (Dili) – Relatorio Investigasaun husi Komisaun Justisa e Paz liderado Padre Herminio Goncalves ba kazu Pedofilia iha Topu Honis involve eis Padre Richard Dasbach ne’ebe koak ba publiku hetan reasaun maka’as husi Lider Nacional, Kay Rala Xanana Gusmao bainhira fo sasin iha Tribunal Distrital Dili, Tersa-feira ne’e.

Eis lider rezistensia ne’e deklara, kumpriende diak kona ba saida mak segredu justisa nune’e ligado ho relatorio investigasaun Komisaun Justisa e Paz ne’ebe Padre Herminio intrega ba nia ho kapasidade hanesan lider nacional la intrega ba ema ruma inklui familia ne’ebe laiha relasaun ho kazu ne’e.

“Ha’u la fo sai, maibé fó ba Barbara Nazareth Oliveira, nu’udar partner-sósiu iha JU,S hanesan empreza sosiál ba apoiu hametin direitu umanu no Estadu Direitu iha Timor-Leste liu husi nia kaben Joaquim Fonseca, Eis Embaixador Timor Leste ba Englatera,”dehan Xanana ba Tribunal.

Komandante Eim Xefe das Falintil ne’e afirma tan katak, la viola segredu justisa tamba relatorio ne’ebe simu husi Padre Herminio la intrega ba nia familia ruma, maibe maibé fó ba Barbara ne’ebe kaer prosesu ba kondenadu Richard Dasbach.

“Tuir ha’u nia komprensaun katak husi visum ne’e rasik hanesan krime boot ida hasoru labarik sira, tanba ne’e ha’u fó relatóriu ne’e ba Barbara hodi haree no diskute hamutuk, atu nune’e, ha’u bele hatene no hasai ha’u nia pozisaun ba kazu Dasbach nian,” Xanana deklara  iha audiénsia julgamentu ne’e.

Xanana hateten, Komisaun Justisa no Paz halo relatóriu ne’e ho intensaun atu haree Dasbach sala dunik ka lae iha kazu pedofilia, hodi entrega ba Bispu Díli, la’ós ba Tribunál maibé ikus mai rezultadu oin seluk.

Ligado ho publikasaun relatóriu ba kazu Topo Honis, Xanana Gusmao husu ba PCIC (Polísia Sientífika Investigasaun Kriminál) atu halo investigasaun ba ema sira ne’ebé deskonfia espalla ka publika relatóriu kazu Topo Honis ne’e, tanba tuir nia, la’ós arguidu sira liderado Padre Herminio maka publika.

“Ha’u husu ba PCIC atu halo investigasaun ba kazu ne’e, hodi hatene se loos maka publika relatóriu ne’e, ha’u ka Barbara,”Xanana hateten ho lian maka’as iha Tribunal laran.

Nia rekuinese, PCIK hanesan instituisaun estado ne’ebe halao servisu buka tuir ema sira utiliza ID falsu hodi halo insulto no seluk tan, husu atu loke investigasaun ba kazu ne’e hodi bele hetan lia los.

Ba kazu ne’e rasik parte Barbara ho Joaquim Fonseca ne’ebe mensiona seidauk aprezenta pozisaun. Enkuanto Julgamentu sei halao fali iha fulan Janeiro 2022 hodi ba kontinua rona deklarasaun husi Media Lusa ho Tempo Timor. (Ant)