‘Hurlele’ Motor Husi Kotuk to’o Nain Tama Hospital, Polísia Sulan Kondutór Mikrolete Leticia ba Sela

Smnewtl.com (06-12-21) – Domingu, (05-12-2021) horseik mosu asidente tráfiku ida entre Microlet ho Motorizada ida iha area Postu Polísia Tránzitu Leader Comoro oin, rezulta sidadaun ne’ebe kondus motorizada tenki evakua kedas ba Hospital Nacional Guido Valdares Dili hodi hetan tratamentu tamba sofre kanek.

Polísia Nasionál Timor-Leste (PNTL) liu husi seksaun tránzitu munisípiu Dili, kaptura kedas kondutór mikrolete 0 10 Leticia no submete bá sela detensaun Komandu Dili hodi kumpre 72 oras. Polisia detein kondutor ho inisial ADCE , tanba soke vítima ho motorizada marka beat husi kotuk.

Komandante Polísia Tránzitu Munisípiu Dili, Inspetór Xefe Domingos Sarmento Gama hateten, hafoin asidente ne’e akontese, Polísia Tránzitu to’o kedas iha fatin hodi asegura viatura motorizada ho mikrolete inklui kondutór mikrolete ne’e.

“Asidente mikrolete ida ho motor ne’e akontese iha area Postu Leader nia oin, ita-nia kondutór mikrolete ne’e karta kondusaun laiha, no nia soke tan motorizada husi kotuk. Ita identifika nia karta kondisaun laiha, ne’ebé agora nia submete hela bá prosesu oras 72, tamba viola kódiku penal 207,” dehan Inspetór Xefe Domingos Gama iha Komandu Polísia Munisípiu Dili, Segudan ne’e.

Gama informa, vítima ne’ebé kondús motor beat evakua kedas bá ospitál hodi halo tratamentu saúde maske ladun sofre kanek grave.

Ba asidente, Komandante Polisia Transito li-liu Municipio Dili bolu atensaun ba sidadaun sira hotu ne’ebe kondus tanto motor ho kareta atu respeita ba orden publiku li-liu tenki iha dokumentus hanesan karta kondusaun no seluk tan inklui kuidadu a’an hodi la lori perigu ba ema seluk. (ant)