Horta Seidauk Reafirma Kandidatrura, CNRT Deside Domingo Ne’e Iha Konferensia

Smnewstl.com 19-01-2022 (Dili) – Premiado Nobel da Paz, Ramos Horta to’o oras ne’e seidauk deside ninia pozisaun hodi re-kandidata a’an ba Presidente Republika maske timor-oan barak maka deklara ona sira nia apoio hodi lori fila Diplomata ne’e ba tu’ur iha Aitarak Laran.

Hafoin Presidente Republika, Francisco Guterres Lu-olo dekreta kalendario eleisaun Presidensial iha loron 15 Janeiro 2022, timor-oan hirak ne’ebe reafirma ona ba publiku sira nia kandidatura mak hanesan eis Padre Martinho Gusmao, Milena Pires, Armanda Berta atual Presidente Khunto ne’ebe komfirmadu lokoraik ne’e deklara ofisial iha Salao Esperansa Delta Dili inklui atual Presidente Lu-Olo rasik ne’ebe deklara ona iha Ermera.

Veronica Borges Estudante UNDIL konsidera, timor-oan hirak iha leten maioria mesak potensial inklui Armanda Berta ho esperensia iha governasaun nomos Milena Pires, maibe nafatin rekuinese Francisco Guterres Lu-Olo nudar kandidatu determinante tamba hetan apoio husi partido mais votado Fretilin.

Maske nune’e universitaria ne’e argumenta, liga ba situasaun atual nomos kondisaun ekonimia rai laran bainhira Premiado Nobel da Paz, Jose Ramos Horta re-kandidata a’an maka prosesu kompeteisaun festa demokrasia sei rame liu tan no potensia ba kandidatu ida atu manan iha ronde dahuluk mos sei todan oituan.

Aliende ne’e, Carolinos da Costa nudar aileba fo nia hanoin katak, Timor Leste presiza tebes figura ne’ebe influensia mundo. Hanesan siudadaun ne’ebe depende moris ba a’an rasik liu husi fila liman perefere Premiado Nobel da Paz Jose Ramos tamba sente ona lider ne’e nia obra durante luta ba libertasaun patria nomos iha prosesu dezenvolvimentu nasional bainhira hamutuk ho Kay Rala Xanana Gusmao.

“Momentu maun bo’ot Jose Ramos Horta hanesan Presidente Republika no Kay Rala Xanana Gusmao hanesan Primeiro Ministro, ami aileba hamrik iha dalan sente duni benefisiu. Aifuan ne’ebe ita fa’an ema hola taka matan no folin duni, maibe la hatene tamba saida maka monu fali ba lideransa sira seluk hanesan Maun Taur Matan Ruak ho Presidente Lu-Olo la hanesan ne’e,”nia kestiona.

Tuir informasaun ne’ebe Smnews asesu komfirma, Premiado Nobel da Paz komfirmadu sei re-kandidata a’an maibe sei hein desizaun husi Kay Rala Xanana Gusmao. Enkuanto Partido CNRT liu husi reuniaun Comisaun Politika Nacional (CPN) liderado Kay Rala Xanana Gusmao deside fo sai kandidatura liu husi Konferensia Nacional, ne’ebe sei halao Domingo ne’e iha Salao Rudal Hudi Laran Dili.

Konferensia ne’e rasik tuir informasaun ne’ebe Smnews asesu komfirma, sei partisipa husi delegado atus lima resin inklui observador atus rua resin. Liu husi konferensia ne’e maka sei deside kandidatu husi Partido CNRT hodi ba kompete iha Eleisaun Presidensial 2022-2027. (Rio)